ക്രിസ്തുമസ് – മനുഷ്യന്റെ വേദനകളിൽ അവൻ ഒറ്റയ്ക്കല്ല എന്ന് ബോധ്യപ്പെടുത്തുന്നതിനും അവനെ ലോകത്തിന്റെ സകല വേദനകളിൽ നിന്നും മോചിപ്പിക്കുന്നതിനുമായി ദൈവപുത്രൻ ലോകത്തിലേയ്ക്ക് ആഗതനായതിന്റെ ഓർമ്മയാചരിക്കുന്ന നിമിഷം. ദൈവം ലോകത്തിലേയ്ക്ക് വന്നപ്പോൾ അവിടുന്നു സുഖസൗകര്യങ്ങളുടെ നടുവിലേയ്ക്കല്ല പിറന്നു വീണത്. വേദനകളുടെയും കഷ്ടപ്പാടുകളുടെയും നടുവിലായിരുന്നു ആ ദിവ്യ ജനനം. തുടർന്നുള്ള ജീവിതത്തിലും അവിടുന്ന് വേദനിക്കുന്നവരുടെ ഒപ്പമായിരുന്നു. അവരുടെ വേദനകളും ദു:ഖങ്ങളും മാറ്റിക്കൊണ്ട് ഈശോ ചുറ്റി സഞ്ചരിച്ചു.
ഈശോ തന്റെ ജീവിതത്തിൽ അനേകം രോഗികളെ കണ്ടു. അവരുടെ വേദനകൾ മനസിലാക്കി. ആ വേദനകളിലേയ്ക്ക് കടന്നു ചെന്നു. പിതാവിന്റെ നാമത്തിൽ അവയെല്ലാം സുഖപ്പെടുത്തി. രോഗത്താൽ വലഞ്ഞു ജീവിതത്തിൽ പ്രതീക്ഷ നഷ്ടപ്പെട്ട അനേകം ആളുകളെ സുഖപ്പെടുത്തി അവരെ പുതു ജീവിതത്തിലേയ്ക്ക് കൈപിടിച്ച് നടത്തി. രോഗത്താൽ കഷ്ടപ്പെട്ടവരെ സഹായിച്ച ഈശോയെപോലെ നമുക്കും അവരോടൊപ്പം ഈ ക്രിസ്‍മസ് കാലം ആയിരിക്കാം.
പുൽക്കൂട്ടിലേയ്ക്കുള്ള ഈ യാത്രയിൽ നമ്മുടെ അവയവങ്ങൾ ദാനം ചെയ്യാൻ തീരുമാനം എടുക്കാം. കൂടാതെ രക്തം ദാനം ചെയ്യാൻ കിട്ടുന്ന അവസരങ്ങൾ പരമാവധി പ്രയോജനപ്പെടുത്താം. രോഗാവസ്ഥയിൽ കഴിയുന്ന നമ്മുടെ പ്രിയപ്പെട്ടവർക്കായി അനുദിനം പ്രാർത്ഥിക്കാം. അങ്ങനെ രോഗികളായവരെ പരിഗണിച്ചു കൊണ്ട് പുൽക്കൂട് യാത്രയിൽ നമുക്ക് മുന്നേറാം.
