കർത്താവ് നമ്മോടൊപ്പം എന്നുമുണ്ടെന്നും അവിടുന്ന് നമ്മെ ഒരിക്കലും കൈവിടില്ലെന്നും ബ്രാറ്റിസ്ലാവയിലെ ബെത്‌ലഹേം എന്ന അഗതിമന്ദിര സന്ദർശനവേളയിൽ ഫ്രാൻസിസ് മാർപാപ്പ പറഞ്ഞു. മിഷനറീസ് ഓഫ് ചാരിറ്റി സന്യാസ സമൂഹം നടത്തുന്ന ഈ സ്ഥാപനത്തിൽ എത്തിച്ചേർന്ന പാപ്പാ, 20 മിനിറ്റോളം അവിടെ ചിലവഴിക്കുകയും അന്തേവാസികളോട് സംസാരിക്കുകയും ചെയ്തു.
“കർത്താവ് ഇപ്പോഴും നമ്മോടടുത്തിരിക്കുന്നു. ചിലപ്പോൾ നമുക്കവനെ കാണാൻ സാധിക്കും, എന്നാൽ മറ്റു ചിലപ്പോൾ സാധിക്കില്ല. പക്ഷേ ജീവിതപാതയിൽ അവൻ ഇപ്പോഴും നമ്മോടൊപ്പമുണ്ട്. പ്രത്യേകിച്ച് കഷ്ടതയുടെ സമയങ്ങളിൽ” – പാപ്പാ പറഞ്ഞു.
ഫ്രാൻസിസ് പാപ്പായുടെ ബുഡാപെസ്റ്റിലേക്കും സ്ലോവാക്യയിലേക്കുമുള്ള അപ്പസ്തോലികയാത്ര സെപ്റ്റംബർ 15 -ന് അവസാനിക്കും. ബെത്‌ലഹേം സെന്ററിന്റെ പുറത്ത് നിരവധി വിശ്വാസികൾ പാപ്പായെ കാണുവാൻ എത്തിച്ചേർന്നിരുന്നു. പാപ്പാ ഏവരെയും അഭിസംബോധന ചെയ്യുകയും ചെയ്തു.
