എറണാകുളം – അങ്കമാലി അതിരൂപത മെത്രാപ്പോലീത്തൻ വികാരി ആർച്ച്ബിഷപ് മാർ ആന്റണി കരിയിലിന്റെ സ്ഥാനമേൽക്കൽ ശുശ്രൂഷ ഇന്ന് നടക്കും. എറണാകുളം സെന്റ് മേരീസ് കത്തീഡ്രൽ ബസിലിക്കയിൽ രാവിലെ 10.30-ന് കൃതജ്ഞതാബലിയോടെയാണു ശുശ്രൂഷകൾ.
അതിരൂപത ചാൻസലർ റവ. ഡോ. ജോസ് പൊള്ളയിൽ, മെത്രാപ്പോലീത്തൻ വികാരിയുടെ നിയമനം സംബന്ധിച്ച ഡിക്രി വായിക്കും. മേജർ ആർച്ച്ബിഷപ് കർദ്ദിനാൾ മാർ ജോർജ്ജ് ആലഞ്ചേരി സന്ദേശം നൽകും. തുടർന്ന് ആർച്ച്ബിഷപ് മാർ ആന്റണി കരിയിലിന്റെ മുഖ്യകാർമ്മികത്വത്തിലാണ് കൃതജ്ഞതാബലി. ബിഷപ്പുമാരായ മാർ സെബാസ്റ്റ്യൻ എടയന്ത്രത്ത്, മാർ ജോസ് പുത്തൻവീട്ടിൽ, മാർ തോമസ് ചക്യത്ത്, മാർ സെബാസ്റ്റ്യൻ വാണിയപ്പുരയ്ക്കൽ എന്നിവർ സഹകാർമ്മികരാകും.
തുടർന്നു നടക്കുന്ന സമ്മേളനത്തിൽ വരാപ്പുഴ ആർച്ച്ബിഷപ് ഡോ. ജോസഫ് കളത്തിപ്പറമ്പിൽ, ബംഗളൂരു അതിരൂപത വികാരി ജനറാൾ മോണ്. എസ്. ജയനാഥൻ, മാണ്ഡ്യ നിയുക്ത ബിഷപ് മാർ സെബാസ്റ്റ്യൻ എടയന്ത്രത്ത്, സിഎംഐ പ്രിയോർ ജനറാൾ റവ.ഡോ. പോൾ ആച്ചാണ്ടി, അതിരൂപത വികാരി ജനറാൾ റവ. ഡോ. ജോസ് പുതിയേടത്ത്, പ്രസ്ബിറ്ററൽ കൗണ്സിൽ സെക്രട്ടറി റവ. ഡോ. കുര്യാക്കോസ് മുണ്ടാടൻ, എഫ്സിസി പ്രൊവിൻഷ്യൽ സുപ്പീരിയർ സിസ്റ്റർ ആനീറ്റ, പാസ്റ്ററൽ കൗണ്സിൽ സെക്രട്ടറി പി.പി. ജരാർദ് എന്നിവർ ആശംസാ പ്രസംഗം നടത്തും.