ഒരു ലക്ഷം രൂപയ്ക്ക് പള്ളി പണിയാമോ?

ഫാ. ജെൻസൺ ലാസാലെറ്റ്
ഫാ. ജെൻസൺ ലാസാലെറ്റ്

ആന്ധ്രയിലെ ഒരു ഗ്രാമത്തിൽ പള്ളി പണിത കഥ.

തകർന്നുവീഴാറായ പള്ളി പൊളിച്ചുമാറ്റി പുതിയത് പണിയണമെന്ന ആഗ്രഹം ഗ്രാമീണർക്കു മുഴുവനും ഉണ്ടായിരുന്നു. എന്നാൽ പള്ളി പണിയാൻ നയാ പൈസ കൈവശമില്ലാതാനും. പള്ളി പണിയാനുള്ള അനുവാദം മെത്രാനച്ചൻ കൊടുത്തെങ്കിലും സാമ്പത്തികം സ്വയം കണ്ടെത്തണമെന്നായിരുന്നു വ്യവസ്ഥ.

ലാസലെറ്റ് സഭയിലെ പ്രൊവിൻഷ്യാളച്ചൻ ഒരു ലക്ഷം രൂപ എന്നെ ഏൽപിച്ചു പറഞ്ഞു: “ജെൻസനച്ചാ, ഇത് സഭയുടെ ഭാഗത്തു നിന്നുള്ള സംഭാവനയാണ്. ബാക്കി അച്ചനാണ് കണ്ടെത്തേണ്ടത്. ദൈവം അച്ചനെ സഹായിക്കട്ടെ.”

ഒരു ലക്ഷം രൂപ കൊണ്ട് ഒന്നുമാകില്ലെന്നറിയാമെങ്കിലും. എങ്കിലും കിട്ടിയ പണവുമായി ഞാൻ പള്ളിയിലിരുന്ന് പ്രാർത്ഥിച്ചു. കർത്താവ് എന്നോടു പറഞ്ഞു: “പുതിയ പളളി പണിയണമെങ്കിൽ ആദ്യം  ചെയ്യേണ്ടത് നിലവിലുള്ള പള്ളി പൊളിച്ചുമാറ്റുക. എന്നിൽ വിശ്വസിക്കുക. ഞാൻ കൂടെയുണ്ട്.”

കർത്താവ് പറഞ്ഞതുപോലെ ഞങ്ങൾ ചെയ്തു. പഴയ പള്ളി പൊളിച്ചുമാറ്റി പുതിയ ദൈവാലയത്തിന്റെ പണികള്‍ ആരംഭിച്ചു. ഇഷ്ടികക്കളത്തിൽ പണിയെടുക്കുന്നവർ അവരുടെ മുതലാളിമാരോട് പറഞ്ഞ് ഇഷ്ടിക സ്പോൺസർ ചെയ്യിപ്പിച്ചു. പണിക്ക് ആവശ്യമുള്ള മണൽ ഗോദാവരി നദിയിൽ നിന്ന് ഇടവകക്കാർ തന്നെ ശേഖരിച്ചു. ഇടവകക്കാരിൽ മറ്റുചിലർ അവരുടെ വീടുപണിക്ക് വാങ്ങിവച്ച ഏതാനും വസ്തുക്കൾ  സംഭാവനയായി നൽകി. സാധുക്കളായ ഇടവകക്കാരിൽ ഭൂരിഭാഗം പേരും വീടൊന്നിന് നിശ്ചയിച്ചിരുന്ന ആയിരം രൂപ നൽകുകയും ചെയ്തു.

ഈ സമയത്താണ് ടൗണിൽ ഒരു പള്ളി പൊളിക്കുന്ന വിവരം ഞങ്ങൾ അറിയുന്നത്. അവിടുത്തെ വികാരിയച്ചനോട് പറഞ്ഞ് കുറച്ച് പഴയ കട്ടിളകളും വാതിലുകളും ഞങ്ങൾ ശേഖരിച്ചു. നഗരത്തിലെ ടൈൽസ് ഫാക്ടറിയിൽ നിന്ന് അരികു പൊട്ടിയ ടൈലുകൾ കുറഞ്ഞ വിലക്ക് വാങ്ങി, പൊട്ടിയ ഭാഗത്ത് ഡിസൈൻ വർക്കുകൾ ചെയ്ത് ഇടവകയിലെ യുവാക്കൾ തന്നെ പള്ളിക്കകം ടൈൽ വിരിച്ചു. അങ്ങനെ 2014-ൽ അത്ഭുതകരമായി ആ ദൈവാലയം ആശീർവദിക്കപ്പെട്ടു.

അന്നേ ദിവസം പിതാവ് പറഞ്ഞ വാക്കുകൾ ഇന്നും എന്റെ മനസിൽ മായാതെ നിൽക്കുന്നു: “മനുഷ്യകരങ്ങളിലൂടെ ദൈവം ചെയ്ത അത്ഭുതമാണ് പാവപ്പെട്ടവന്റെ ഈ ദൈവാലയം…”

അതെ, നൂറു ശതമാനവും ദൈവത്തിന്റെ കരവേലയായിരുന്നു ആ ദൈവാലയം. അതല്ലെങ്കിൽ ഒരു ലക്ഷം രൂപ കൊണ്ട് പള്ളി പണിയാൻ ആർക്കാണ് സാധിക്കുക? ഇവിടെയാണ് ക്രിസ്തു അപ്പം വർദ്ധിപ്പിച്ച ആ സംഭവം കൂടുതൽ അർത്ഥവത്താകുന്നത്. ഒരു ബാലന്റെ കരങ്ങളിലെ അഞ്ചപ്പവും രണ്ടു മീനും ഉപയോഗിച്ച് അയ്യായിരങ്ങളെ തീറ്റിപ്പോറ്റാൻ ക്രിസ്തുവിന് കഴിഞ്ഞെങ്കിൽ (Ref: യോഹ. 6:1-15) നമ്മുടെ ഏത് പ്രതിസന്ധികളിലും ദൈവത്തിന് ഇടപെടാൻ കഴിയുമെന്ന് ഉറപ്പാണ്.

ഫാ. ജെൻസൺ ലാസലെറ്റ്

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.