ഓശാനയുടെ ആരവങ്ങൾക്കിടയിലും പീലാത്തോസിന്റെ മുമ്പിൽ സ്വയം ന്യായീകരിക്കാതെ നിശബ്ദനായി നിന്ന ക്രിസ്തു എന്തേ ജറുസലേം ദേവാലയത്തിൽ ചാട്ടവാറെടുത്തത്? തന്റെ പിതാവിന്റെ ആലയത്തെക്കുറിച്ചുള്ള വലിയൊരു തീക്ഷ്ണത ക്രിസ്തുവിനുണ്ടായിരുന്നു. ദൈവത്തിന്റെ ആലയത്തെക്കുറിച്ച്, ദൈവിക കാര്യങ്ങളെക്കുറിച്ച് അവനുണ്ടായിരുന്ന തീക്ഷ്ണത ഇന്ന് നമുക്കുണ്ടോ?
യേശുവിന്റെ പീഡാസഹന-മരണ-ഉത്ഥാനരഹസ്യങ്ങൾ ദേവാലയത്തെക്കുറിച്ചുള്ള സങ്കല്പം തന്നെ മാറ്റിയെഴുതി. പഴയനിയമത്തിൽ കല്ലും മണ്ണും കൊണ്ട് നിർമ്മിമിച്ച ദേവാലയം പുതിയനിയമഭാഷ്യത്തിൽ ദൈവത്തിന്റെ ഛായയിലും സാദൃശ്യത്തിലും സൃഷ്ടിക്കപ്പെട്ട മനുഷ്യശരീരമാണ്. അത് കർത്താവ് വില കൊടുത്ത് വാങ്ങിയതാണ്. “നിങ്ങൾ നിങ്ങളുടെ സ്വന്തമല്ല; നിങ്ങൾ വിലയ്ക്കു വാങ്ങപ്പെട്ടവരാണ്” (1 കോറി 6:20).
ദൈവാലയത്തെ വിശുദ്ധമായും ആദരവോടെയും കാണുന്ന നമ്മൾ സ്വന്തശരീരത്തെയും അതേ വിശുദ്ധിയിലും ആദരവിലും കാത്തുസൂക്ഷിക്കണം. ഉയർന്ന വില കൊടുത്ത് വാങ്ങിയത് ഏറ്റവും ശ്രേഷ്ഠമായി സൂക്ഷിക്കണ്ടത് ആവശ്യവുമാണ്. ദേവാലയത്തിനു നൽകുന്ന ആദരവ് ശരീരത്തിനും നൽകിയാല്‍ വിശുദ്ധി നിനക്ക് കൈയ്യെത്തും ദൂരത്താണ്.
ജിന്‍സി സന്തോഷ്‌
