ഫ്രഞ്ച് വിപ്ലവകാലത്ത് തെക്കുപടിഞ്ഞാറന്‍ ഫ്രാന്‍സിലെ ഇബാര്‍ മലമ്പ്രദേശത്ത് വസിച്ചിരുന്ന ഒരു ദരിദ്ര കര്‍ഷക കുടുംബത്തില്‍ 1797 ഏപ്രില്‍ 15-ന് മൈക്കിള്‍ ജനിച്ചു. ഉപജീവനാര്‍ത്ഥം കുട്ടിക്കാലത്തു തന്നെ മൈക്കിളിന് ഇടയജോലി ചെയ്യേണ്ടിവന്നു. വൈദികനാകാന്‍ മൈക്കിള്‍ ആഗ്രഹിച്ചെങ്കിലും ദാരിദ്ര്യം നിമിത്തം മാതാപിതാക്കള്‍ തടഞ്ഞു. വൈദികര്‍ക്കു വേണ്ടി ജോലി ചെയ്തും മെത്രാനച്ചന്റെ കുശിനിയില്‍ സഹായിച്ചും ആവശ്യമായ വരുമാനമുണ്ടാക്കിയ മൈക്കിള്‍, തത്വശാസ്ത്രവും ദൈവശാസ്ത്രവും പഠിച്ചു. 1823 ഡിസംബറില്‍ പൗരോഹിത്യം സ്വീകരിച്ചു.
വൈദിക ജീവിതാരംഭത്തില്‍ തന്നെ ഫ്രാന്‍സിസ്‌ക്കന്‍ മൂന്നാം സഭാംഗമായി. കാംബോയിലേക്കാണ് ശുശ്രൂഷക്കുള്ള നിയമനം കിട്ടിയത്. വികാരി അനാരോഗ്യവാനായിരുന്നതിനാല്‍ മൈക്കിളച്ചന്‍ ഉത്സാഹപൂര്‍വ്വം പ്രവര്‍ത്തനരംഗത്തിറങ്ങി. ഇടവകയില്‍ അനുദിന ദിവ്യകാരുണ്യ സ്വീകരണവും തിരുഹൃദയഭക്തിയും പരിപോഷിപ്പിച്ചു. ‘ബത്താറാമിലേ തിരുഹൃദയ സമൂഹം’ എന്ന പേരില്‍ ഒരു മിഷനറി സമൂഹം 1838-ല്‍ അച്ചന്‍ ആരംഭിച്ചു. ഈ പ്രസ്ഥാനത്തിന് എതിരായി പലരും പ്രവര്‍ത്തിച്ചു. തന്നിമിത്തം, സ്വന്തമായി അധികാരികളെ തെരഞ്ഞെടുക്കാന്‍ കഴിഞ്ഞത് 1852-ല്‍ മാത്രമാണ്.
1852 മെയ് 14-ന് സ്വര്‍ഗ്ഗാരോഹണ ദിവസം തലച്ചോറിലെ സന്നിവാതം മൂലം മൈക്കിള്‍ മരണമടഞ്ഞു. 1923-ല്‍ വാഴ്ത്തപ്പെട്ടവനായും 1947-ല്‍ വിശുദ്ധനായും പ്രഖ്യാപിക്കപ്പെട്ടു.
വിചിന്തനം: ”നീ സന്തോഷത്തോടെ കുരിശ് ചുമക്കുകയാണെങ്കില്‍, കുരിശ് നിന്നെ ചുമന്ന് നീ ആഗ്രഹിക്കുന്ന ലക്ഷ്യത്തിലെത്തിക്കും.”
ഫാ. ജെ. കൊച്ചുവീട്ടില്‍
