മാര്‍ച്ച് 15 :വി. ളൂയിസ് മരില്ലാക്ക് (1591-1660)

 

വി.വിന്‍സെന്റ് ഡി പോളിന്റെ ‘ഉപവി സഹോദരി’ സഭയുടെ സ്ഥാപികയാണ് വി. ളൂയിസ് മരില്ലക്ക്. 1591 ഓഗസ്റ്റ് 12 ാം തീയതിയാണ് ളൂയിസ് ജനിച്ചത്. ഡോമിനിക്കന്‍ മഠത്തില്‍നിന്നും വിദ്യാഭ്യാസം നേടിയ ളൂയി പിതാവിന്റെ മരണശേഷം പീഡാനുഭവപുത്രികളുടെ സഭയില്‍ അംഗമായി ചേര്‍ന്നു.

എന്നാല്‍ അധികം വൈകാതെതന്നെ അവള്‍ സന്ന്യാസം ഉപേക്ഷിക്കുകയും ഗ്രാസ് എന്നയാളെ വിവാഹം കഴിക്കുകയും ചെയ്തു. അവര്‍ക്ക് ഒരു പുത്രന്‍ ജനിച്ചു. ളൂയിസ് അവനെ ഭക്തിയില്‍ വളര്‍ത്തിക്കൊണ്ടുവന്നു. ഈ അവസരങ്ങളിലും ഉപവിപ്രവര്‍ത്തനങ്ങള്‍ ചെയ്യുന്നതില്‍ അവള്‍ പ്രത്യേകം ശ്രദ്ധിച്ചിരുന്നു. 1625 ല്‍ ഭര്‍ത്താവു മരണമടഞ്ഞതോടെ ശിഷ്ട ജീവിതം ദരിദ്രസേവനത്തിനായി അവള്‍ നീക്കിവച്ചു.

ഈ കാലഘട്ടത്തിലാണ് ളൂയിസ് വി. വിന്‍സെന്റ് ഡി പോളിനെ പരിചയപ്പെടുന്നത്. വിന്‍സെന്റച്ചന്‍ തന്റെ പരോപകാരപ്രവൃത്തികളില്‍ ളൂയിസിനെയും ഭാഗഭാക്കാക്കിയിരുന്നു. ‘ഉപവികളുടെ സഹോദരികള്‍’ എന്ന ഒരു സമൂഹം വി. വിന്‍സെന്റ് ആരംഭിച്ചു. ആ സമൂഹത്തിന്റെ മേല്‍നോട്ടം ളൂയിസിനെയാണ് അദ്ദേഹം ഏല്പിച്ചത്. ളൂയിസായുടെ പ്രചോദനത്താല്‍ സഹോദരിമാര്‍ നിരവധി ആശുപത്രികളും സ്‌കൂളുകളും വൃദ്ധമന്ദിരങ്ങളും അനാഥാലയങ്ങളും സ്ഥാപിച്ചു.

ദൈവസ്‌നേഹത്താല്‍ ജ്വലിച്ചിരുന്ന ളൂയിസ് 1660 ല്‍ 69-ാ മത്തെ വയസ്സില്‍ നിര്യാതയായി. 1934 ല്‍ വിശുദ്ധയായി നാമകരണം ചെയ്യപ്പെട്ടു.

വിചിന്തനം: ”മനുഷ്യര്‍ നമ്മെ നിന്ദിക്കുകയും വേണ്ടപോലെ മാനിക്കാതിരിക്കുകയും ചെയ്യുമ്പോള്‍ ആത്മസാക്ഷിയായി ദൈവത്തെ നാം താത്പര്യത്തോടെ അന്വേഷിക്കുന്നു. മാനുഷികാശ്വാസങ്ങള്‍ തേടാന്‍ ആവശ്യമില്ലാത്തവണ്ണം ദൈവത്തില്‍ ദൃഢമായി നാം ശരണം വയ്ക്കണം” – ക്രിസ്താനുകരണം.

 

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

അഭിപ്രായങ്ങൾ