ജൂണ്‍ 02: നിക്കോസിയായിലെ വിശുദ്ധ ഫെലിക്‌സ് (1715-1787)

1715 നവംബര്‍ 5-ാം തീയതി ഇറ്റലിയിലെ നിക്കോസിയായില്‍ ഒരു ചെരുപ്പുകുത്തിയുടെ മകനായി ഫെലിക്‌സ് ജനിച്ചു. സ്‌കൂള്‍ വിദ്യാഭ്യാസം കൂടാതെ വളര്‍ന്നുവന്ന ഫെലിക്‌സ്, സ്ഥലത്തെ ഒരു ചെരുപ്പുകുത്തിയുടെ കൂടെ തൊഴില്‍ പഠിച്ചുതുടങ്ങി. തൊഴില്‍ പഠിച്ചുകൊണ്ടിരുന്ന സ്ഥലത്തുതന്നെ ഒരു കപ്പൂച്ചിന്‍ ആശ്രമം ഉണ്ടായിരുന്നു. ആശ്രമവാസികളുടെ ജീവിതരീതി ഫെലിക്‌സിനെ വളരെയധികം ആകര്‍ഷിച്ചു.

ഇരുപത് വയസ്സായപ്പോള്‍ കപ്പൂച്ചിന്‍ സഭയില്‍ ചേരാനുള്ള ആഗ്രഹം ആശ്രമാധിപനെ അറിയിച്ചു. ഒരു തുണസഹോദരനായി സഭയില്‍ ചേരാനാണ് അഭിലഷിച്ചത്. പക്ഷേ, പ്രൊവിഷ്യാളച്ചന്‍ ഫെലിക്‌സിനെ തിരസ്‌ക്കരിച്ചു. എങ്കിലും അടുത്ത എട്ടു വര്‍ഷക്കാലം തുടര്‍ച്ചയായി സഭാപ്രവേശനത്തിനായി അദ്ദേഹം അപേക്ഷിച്ചു കൊണ്ടിരുന്നു. എല്ലാം ഫലശൂന്യമാണെന്നു തോന്നിയ സാഹചര്യത്തില്‍ മെസ്സീനായിലേ പ്രൊവിന്‍ഷ്യല്‍, നിക്കോസിയായില്‍ ഒരു സന്ദര്‍ശനത്തിന് എത്തുകയുണ്ടായി. അദ്ദേഹത്തെ കണ്ട് ഫെലിക്‌സ് തന്റെ ആഗ്രഹമറിയിച്ചു. ഇപ്രാവശ്യം ഫെലിക്സ് സ്വീകാര്യനായി.

പരിശീലനകാലത്ത് കഠിനമായ പ്രായശ്ചിത്തങ്ങള്‍ അനുഷ്ഠിച്ചു. വിനീതദാസനായി മറ്റുള്ളവരുടെ തെറ്റുകള്‍ക്കു കൂടി പരിഹാരമനുഷ്ഠിക്കുവാന്‍ അദ്ദേഹം താല്‍പര്യപ്പെട്ടു. ഭിക്ഷാടക സഹോദരനായിട്ടാണ് ഫെലിക്‌സ് നിയോഗിക്കപ്പെട്ടത്. സമ്പന്നരെ തങ്ങളുടെ സ്വത്ത് പങ്കുവയ്ക്കുവാന്‍ പ്രേരിപ്പിച്ചു കൊണ്ടും ദരിദ്രരെ അവരുടെ അനുദിന സഹനങ്ങളില്‍ ആശ്വസിപ്പിച്ചു കൊണ്ടും ഫെലിക്‌സ് ഓരോ ദിവസവും നഗരങ്ങളിലൂടെ കടന്നുപോയി. ഭവനകവാടം തുറന്നു കൊടുക്കുന്നവരും അസഭ്യം പറഞ്ഞ് ഓടിക്കുന്നവരുമുണ്ടായിരുന്നു. എല്ലാറ്റിനും നന്ദിപറഞ്ഞുകൊണ്ട് ”ദൈവസ്‌നേഹത്തെപ്രതി എല്ലാം അങ്ങനെയാകട്ടെ” എന്നു മാത്രമായിരുന്നു ഫെലിക്‌സിന്റെ മറുപടി.

വിദ്യാഹീനനായിരുന്നെങ്കിലും ദൈവവചനവും മറ്റ് ആദ്ധ്യാത്മികപഠനങ്ങളും ശ്രവിക്കുവാനും ശ്രവിക്കുന്നവ ഓര്‍ത്തിരിക്കുവാനും പ്രാവര്‍ത്തികമാക്കുവാനും ഫെലിക്‌സ് സദാ ജാഗരൂകനായിരുന്നു. അപ്രകാരം ആദ്ധ്യാത്മികതയില്‍ അദ്ദേഹം വളര്‍ന്നു. ആത്മീയവും ശാരീരികവുമായ സൗഖ്യം നല്കുവാനുള്ള വരം അദ്ദേഹത്തിന് ദൈവം നല്കിയിരുന്നു.

1787 മെയ് 31-ന് 71-ാമത്തെ വയസ്സില്‍ നിര്യാതനായ ഫെലിക്‌സിനെ 1888 ഫെബ്രുവരി 12-ന് ലെയോ 13-മന്‍ പാപ്പാ വാഴ്ത്തപ്പെട്ടവനായി പ്രഖ്യാപിച്ചു. 2005 ഒക്ടോബര്‍ 23-ന് ബനഡിക്ട് 16-ാമന്‍ പാപ്പാ അദ്ദേഹത്തെ വിശുദ്ധരുടെ പട്ടികയില്‍ ചേര്‍ത്തു.

ഫാ. ജെ. കൊച്ചുവീട്ടില്‍

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.