മാർച്ച് ഒന്നുമുതൽ അടുത്ത ഘട്ടം കോവിഡ് വാക്സിനേഷൻ ആരംഭിച്ചിരിക്കുകയാണ്. 60 വയസ്സിന് മുകളിൽ പ്രായമുള്ളവർക്കും 45-നും 59-നും ഇടയിലുള്ള മറ്റുരോഗങ്ങളുള്ളവർ എന്നിവർക്കുമാണ് വാക്സിൻ നൽകുന്നത്. ഇതിനായി ഈ പ്രായപരിധിയിലുള്ളവർ ഓൺലെെനായി രജിസ്റ്റർ ചെയ്യേണ്ടതുണ്ട്. യോഗ്യരായവർ കോ-വിൻ എന്ന സർക്കാർ പോർട്ടലിലാണ് രജിസ്റ്റർ ചെയ്യേണ്ടത്.
കോവിഡ് 19 വാക്സിനേഷൻ നൽകുന്നത് കൃത്യമായി നിരീക്ഷിക്കാൻ തയ്യാറാക്കിയ ഒരു ഡിജിറ്റൽ പ്ലാറ്റ്ഫോം ആണ് കോ-വിൻ (Co-WIN). മാർച്ച് ഒന്നുമുതൽ സർക്കാർതലത്തിൽ പതിനായിരവും സ്വകാര്യമേഖലയിൽ ഇരുപതിനായിരവും കേന്ദ്രങ്ങളാണ് വാക്സിനേഷന് തയ്യാറാക്കിയിരിക്കുന്നത്. സർക്കാർ കേന്ദ്രങ്ങളിൽ സൗജന്യമായാണ് വാക്സിൻ വിതരണം ചെയ്യുന്നത്. കോ-വിൻ ഡിജിറ്റൽ പ്ലാറ്റ്ഫോം ഫെബ്രുവരി 27,28 തിയതികളിലായാണ് Co-WIN 1.0 എന്നതിൽ നിന്നും Co-WIN 2.0 ലേക്ക് മാറാൻ ഷെഡ്യൂൾ ചെയ്തിരിക്കുന്നത്. ആദ്യഘട്ടം വാക്സിനേഷൻ ജനുവരി 16 ന് ആണ് തുടങ്ങിയത്.
വാക്സിനേഷന്റെ രണ്ടാംഘട്ടത്തിൽ വാക്സിനെടുക്കേണ്ടവർ തിങ്കളാഴ്ച മുതൽ കോ-വിൻ ആപ്പ് വഴി രജിസ്റ്റർ ചെയ്യേണ്ടതുണ്ട്. ജി.പി.എസ്. സംവിധാനമുള്ളതാണ് കോ-വിൻ ആപ് ആപ്പിന്റെ പരിഷ്ക്കരിച്ച പുതിയ പതിപ്പ്. കോവിഷീൽഡ് വാക്സിൻ ആണോ കോവാക്സിൻ ആണോ വേണ്ടത് എന്ന് രജിസ്റ്റർ ചെയ്യുന്നവർക്ക് തിരഞ്ഞെടുക്കാനുള്ള സൗകര്യം ഉണ്ട്.
കോ-വിൻ ആപ്പോ അല്ലെങ്കിൽ cowin.gov.in എന്ന വെബ്സെെറ്റോ തുറക്കുക, മൊബെെൽ നമ്പറോ ആധാർ നമ്പറോ എന്റർ ചെയ്യുക, അക്കൗണ്ട് ക്രിയേറ്റ് ചെയ്യുന്നതോടെ ഒരു ഒ.ടി.പി. ലഭിക്കും, ഈ അക്കൗണ്ടിൽ കുടുംബാംഗങ്ങളെക്കൂടി രജിസ്റ്റർ ചെയ്യാം, രജിസ്റ്റർ ചെയ്താൽ വാക്സിൻ എടുക്കേണ്ട തിയ്യതിയും സമയവും കേന്ദ്രവും ലഭിക്കും. ഇവിടെ പോയി വാക്സിൻ എടുക്കാം, വാക്സിനേഷൻ സ്വീകരിച്ചാൽ വാക്സിനേഷൻ സർട്ടിഫിക്കറ്റും മോണിറ്ററിങ് റെഫറൻസ് ഐ.ഡിയും ലഭിക്കും, 45 വയസ്സിന് മുകളിലുള്ളവർ രോഗാവസ്ഥയെക്കുറിച്ചുള്ള ഡോക്ടറുടെ സർട്ടിഫിക്കറ്റ് അപ് ലോഡ് ചെയ്യണം. ഏതൊക്കെ രോഗാവസ്ഥയിലുള്ളവരെയാണ് ഉൾപ്പെടുത്തേണ്ടത് എന്ന് സർക്കാർ ഇതുവരെ വ്യക്തമാക്കിയിട്ടില്ല.
