ലോകം മുഴുവനുമുള്ള വിശ്വാസികളെ പ്രാര്‍ത്ഥനയില്‍ ഒന്നിപ്പിക്കുക എന്ന ലക്ഷ്യവുമായി രൂപപ്പെടുത്തിയ ക്ലിക്ക് ടു പ്രയര്‍ ആപ്പിന്റെ ഉദ്ഘാടനം ഫ്രാന്‍സിസ് പാപ്പാ നിര്‍വഹിച്ചു. ലോകത്തിന്റെ വിവിധ ഭാഗങ്ങളിലുള്ള ആളുകളുടെ പ്രാര്‍ത്ഥനാവശ്യങ്ങള്‍ പങ്കുവയ്ക്കുവാനും പരസ്പരം പ്രാര്‍ത്ഥനയില്‍ ഒന്നിക്കുവാനും വേണ്ടിയാണ് ഈ ആപ് രൂപപ്പെടുത്തിയത്.
ഈ ആപ്ലിക്കേഷനിലൂടെ ആളുകള്‍ക്ക് ആറ് ഭാഷയിലുള്ള പ്രാര്‍ത്ഥനകള്‍ ലഭ്യമാകും. ഒപ്പംതന്നെ പ്രാര്‍ത്ഥനാസഹായങ്ങള്‍ ചോദിച്ചുകൊണ്ടുള്ള സന്ദേശങ്ങള്‍ കാണുവാനും പ്രാര്‍ത്ഥിക്കുവാനും കഴിയും. കൂടാതെ, പ്രാര്‍ത്ഥനാസഹായം ആവശ്യപ്പെട്ടു കൊണ്ടുള്ള സന്ദേശം എത്ര പേരിലേക്ക് എത്തി എന്ന് അറിയുവാനും കഴിയും. ഫ്രാന്‍സിസ് പാപ്പായുടെ പ്രാര്‍ത്ഥനാ നിയോഗങ്ങളും ഈ ആപ്ലിക്കേഷനിലൂടെ ലഭ്യമാകും.
പ്രാര്‍ത്ഥനയില്‍ ഒന്നാകുവാനുള്ള ഇത്തരം അവസരങ്ങള്‍ ശരിയായി ഉപയോഗപ്പെടുത്തുവാനും ലോകം മുഴുവനുള്ള ക്രൈസ്തവര്‍ പരസ്പരം ശക്തിപ്പെടുത്തി കൊണ്ട് മുന്നേറുവാനും പാപ്പാ ആഹ്വാനം ചെയ്തു.
