യേശുക്രിസ്തുവിന്റെ സാന്നിധ്യത്തെ കേന്ദ്രബിന്ദുവാക്കിക്കൊണ്ട് ക്രിസ്തുമസ് ആഘോഷിക്കണമെന്ന് ഫ്രാൻസിസ് മാർപാപ്പ കത്തോലിക്കാരോട് ആഹ്വാനം ചെയ്തു. വാണിജ്യ-ഉപഭോഗസംസ്കാരത്തെ മാറ്റിനിർത്തണമെന്നും അദ്ദേഹം ഉദ്ബോധിപ്പിച്ചു.
“വ്യാജ ക്രിസ്തുമസ് ആഘോഷിക്കരുത്. പകരം ദൈവത്തിന്റെ സാമീപ്യത്തിൽ നമ്മെത്തന്നെ പൊതിയുക. കല, സംഗീതം, പാട്ടുകൾ, പാരമ്പര്യങ്ങൾ എന്നിവ ഹൃദയത്തിലേക്ക് കൊണ്ടുവരുന്ന ക്രിസ്തുമസ് അന്തരീക്ഷത്താൽ സ്വയം പൊതിയുക” – പാപ്പാ വ്യക്തമാക്കി.
വത്തിക്കാനിലെ 2021- ലെ പുൽക്കൂടിന്റെയും സെന്റ് പീറ്റേഴ്‌സ് സ്ക്വയറിലെ ക്രിസ്തുമസ് ട്രീയുടെയും ഉദ്ഘാടനത്തിനു മുന്നോടിയായി, പെറുവിൽ നിന്നും ഇറ്റലിയിൽ നിന്നുമുള്ള പ്രതിനിധികളെ കണ്ട് സംസാരിക്കുകയായിരുന്നു ഫ്രാൻസിസ് മാർപാപ്പ.
