കാലാവസ്ഥാ വ്യതിയാനങ്ങളെയും പ്രകൃതിദുരന്തങ്ങളെയും നേരിടാൻ പരിസ്ഥിതിയെ സംരക്ഷിക്കുന്നതിനുള്ള പൊതുവായ ശ്രമത്തിൽ കൈകോർക്കാൻ തീരുമാനിച്ച് ബംഗ്ലാദേശിലെ കത്തോലിക്കർ. കത്തോലിക്കാ ബിഷപ്പുമാരുടെ കോൺഫറൻസ് (സിബിസിബി), ക്രിസ്ത്യൻ ചാരിറ്റി ഓർഗനൈസേഷനായ വേൾഡ് വിഷൻ ബംഗ്ലാദേശ് എന്നിവയുടെ എപ്പിസ്കോപ്പൽ ജസ്റ്റിസ് ആന്റ് പീസ് കമ്മീഷൻ (ഇസിജെപി) സംയുക്തമായി സംഘടിപ്പിച്ച ഒരു വെബ്ബിനാർ വേളയിലാണ് ബംഗ്ലാദേശിലെ ക്രിസ്ത്യാനികൾ ഒരുമിച്ച് പ്രവർത്തിക്കാനുള്ള ഈ തീരുമാനം എടുത്തത്.
വിവിധ ക്രൈസ്തവ വിഭാഗങ്ങളിൽ നിന്നുള്ള എൺപതോളം മത-സംഘടനാനേതാക്കൾ ‘സൃഷ്ടിയുടെ കാലത്തെക്കുറിച്ചുള്ള ഇന്റർഡെനോമിനേഷൻ ഡയലോഗ് – കാലാവസ്ഥാ വ്യതിയാനവും ദുരന്തവും തടയുന്നു’ എന്ന വിഷയത്തിൽ രണ്ട് മണിക്കൂറുകൾ നീണ്ട ചർച്ചകളിൽ പങ്കെടുത്തു. സൃഷ്ടിക്കപ്പെട്ട ലോകത്തെ സംരക്ഷിക്കുന്നതിനും മെച്ചപ്പെടുത്തുന്നതിനുമായി സെപ്റ്റംബർ ഒന്നു മുതൽ ഒക്ടോബർ നാല് വരെയുള്ള സൃഷ്ടിയുടെ കാലത്തിന്റെ ഭാഗമായിരുന്നു ഈ സംരംഭം. പരിസ്ഥിതിയെ പരിപാലിക്കുന്നതിനും കാലാവസ്ഥാ വ്യതിയാനവും പ്രകൃതിദുരന്തങ്ങളും മൂലമുണ്ടാകുന്ന ദോഷകരമായ പ്രത്യാഘാതങ്ങൾ പരിഹരിക്കുന്നതിനും കൂട്ടായ പ്രവർത്തനം ആരംഭിക്കുന്നതിനും ക്രൈസ്തവ വിഭാഗങ്ങൾ, ഓർഗനൈസേഷനുകൾ, കമ്മ്യൂണിറ്റികൾ എന്നിവയ്ക്കിടയിൽ പ്രാർത്ഥനയും കൂട്ടായ്മയും പ്രോത്സാഹിപ്പിക്കുമെന്ന് വെബ്ബിനാറിൽ പങ്കെടുത്തവർ പ്രതിജ്ഞയെടുത്തു.
ദൈവം ലോകത്തെ സൃഷ്ടിക്കുകയും അതിനെ പരിപാലിക്കാനുള്ള ഉത്തരവാദിത്വം മനുഷ്യരാശിയോട് കൽപ്പിക്കുകയും ചെയ്തിട്ടുണ്ട്. എന്നാൽ മനുഷ്യൻ പലവിധത്തിൽ അത് ദുരുപയോഗം ചെയ്യുന്നു. അതിനാലാണ് ഇത്രയധികം ദുരന്തങ്ങൾ നമുക്കെല്ലാവർക്കും സംഭവിക്കുന്നത്. ഇപ്പോൾ അത് നിർത്തേണ്ട കാലമായി. കൂടുതൽ ദോഷം വരുത്തരുത്. ദൈവത്തിന്റെ സൃഷ്ടിയെ നമ്മുടെ ഹൃദയത്തോടും ആത്മാവോടും കൂടെ സ്നേഹിക്കേണ്ട സമയം അതിക്രമിച്ചിരിക്കുന്നു. ഒരു നല്ല ഭൂമി, ഭാവിതലമുറയ്ക്ക് കൈമാറാൻ നമുക്ക് ഉത്തരവാദിത്വമുണ്ട്” – ഇസിജെപി പ്രസിഡന്റ് ബിഷപ്പ് ഗെർവാസ് റൊസാരിയോ പറഞ്ഞു.
ആഗോളതാപനത്തിന്റെയും കാലാവസ്ഥാ വ്യതിയാനത്തിന്റെയും ഫലമായി ധ്രുവീയ മഞ്ഞുമലകൾ ഉരുകുന്നതുമൂലം സമുദ്രനിരപ്പ് ഉയരുമെന്ന് പ്രവചിക്കപ്പെടുന്ന ലോകത്തിലെ ഏറ്റവും അപകടകരമായ സ്ഥലങ്ങളിലൊന്നാണ് 160 ദശലക്ഷത്തിലധികം വരുന്ന ബംഗ്ലാദേശ് എന്നാണ് കാലാവസ്ഥാ ശാസ്ത്രജ്ഞർ വിലയിരുത്തുന്നത്.
