പോർട്ട സാന്താ അനയ്ക്ക് സമീപം സ്ഥിതി ചെയ്യുന്ന 89 വിയ- ബോർഗോ പിയോയിൽ, റോമിലെ സഭാപരമായ ചരിത്രത്തെയും പാരമ്പര്യത്തെയും പ്രതിനിധീകരിക്കുന്ന ഐക്കണിക് തയ്യൽ കടയായ ‘മാഞ്ചിനെല്ലി ക്ലെർജി’ സ്ഥിതിചെയ്യുന്നു. പുതിയ പാപ്പയുടെ വസ്ത്രം തയ്ക്കുന്നതിന് ചുമതലയുള്ള വ്യക്തിയാണ് തയ്യൽക്കാരനായ റാനിയേറോ മാഞ്ചിനെല്ലി. ഇത് നാലാമത്തെ പാപ്പയ്ക്കായാണ് അദ്ദേഹം വസ്ത്രം ഒരുക്കുന്നത്. ചെറുതും ഇടത്തരവും വലുതുമായ മൂന്നു വ്യത്യസ്ത വലിപ്പങ്ങളിലുള്ള വസ്ത്രങ്ങൾ ഏകദേശം തയ്യാറാണ്.
ആറ് പതിറ്റാണ്ടിലേറെയായി താൻ ചെയ്തുവരുന്ന ജോലിയുടെ വിശദാംശങ്ങൾ അദ്ദേഹം പങ്കുവയ്ക്കുന്നു. “ഞാൻ ജോൺ പോൾ രണ്ടാമൻ പാപ്പ, ബെനഡിക്റ്റ് പതിനാറാമൻ പാപ്പ, ഫ്രാൻസിസ് പാപ്പ എന്നിവരുടെ വസ്ത്രം തയ്ച്ചിട്ടുണ്ട്‌. ഇത് നാലാമത്തെ പാപ്പയുടെ വസ്ത്രമാണ് തയ്ക്കുന്നത്. ഇനി വളരെ കുറച്ച് മാത്രമേ ബാക്കിയുള്ളൂ.” കോൺക്ലേവ് ആരംഭിക്കുന്നതിന് മുമ്പ് തന്നെ മാഞ്ചിനെല്ലി പറയുന്നു.
നാല് പാപ്പമാരുടെ വസ്ത്രം തയ്ച്ചത് മാത്രമല്ല താൻ ഏറ്റവും വിലമതിക്കുന്നത്. ദൈവത്തിന് ജീവിതം സമർപ്പിച്ചവരെ സേവിക്കാൻ കഴിയുന്നതാണെന്ന് അദ്ദേഹം പറയുന്നു.
