“കഴിഞ്ഞ മൂന്നു ദിവസമായി എനിക്ക് നടക്കുവാൻ സാധിക്കുന്നുണ്ട്” സ്വതസിദ്ധമായ ശൈലിയിൽ ചിരിച്ചു കൊണ്ട് ബ്രസീലിയയിൽ നിന്നുള്ള ബിഷപ്പുമാരോട് സംസാരിച്ച പാപ്പായുടെ മുഖം സന്തോഷത്താൽ നിറഞ്ഞിരുന്നു. ജൂൺ 25-ന് നടന്ന ലോക കുടുംബങ്ങളുടെ സമാപന കുർബാനയ്ക്കിടെയും ജൂൺ 27-ന് നിയോകാടെക്യുമെനൽ വേ അംഗങ്ങൾക്കൊപ്പം പോൾ ആറാമൻ ഹാളിന്റെ വേദിയിലൂടെയും അല്പദൂരം നടന്നതിന് ശേഷം ആയിരുന്നു പാപ്പാ ഈ കാര്യം പങ്കുവച്ചത്.
രണ്ടു മാസത്തോളമായി കാൽമുട്ടിനുള്ള ചികിത്സയെ തുടർന്ന് മിക്കവാറും പൊതുപരിപാടികളിലും പാപ്പാ വീൽചെയർ ഉപയോഗിച്ചിരുന്നു. ജൂൺ 27 – ന് വോക്കിങ് സ്റ്റിക്കിന്റെ സഹായത്താൽ അപ്പസ്തോലിക വസതിയിലൂടെ നടക്കുന്ന പാപ്പായുടെ ചിത്രം പുറത്തുവന്നിരുന്നു.
മെയ് ആദ്യവാരം കാൽമുട്ടിനുള്ള വേദനയെ തുടർന്ന് ചികിത്സയിലായിരുന്നു ഫ്രാൻസിസ് പാപ്പാ. തന്റെ മോശം ആരോഗ്യസ്ഥിതി കണക്കിലെടുത്ത് ലെബനനിലേക്കും ദക്ഷിണ സുഡാനിലേക്കുമുള്ള രണ്ട് അന്താരാഷ്ട്ര യാത്രകൾ അദ്ദേഹം മാറ്റിവച്ചിരുന്നു.