സാവോ പോളോ, പരാന സംസ്ഥാനങ്ങളെ തമ്മിൽ ബന്ധിപ്പിക്കുന്ന പ്രധാന റോഡുകളിലൊന്നായ ബ്രസീലിലെ BR-369 ഹൈവേക്ക് സമീപം സ്ഥിതിചെയ്യുന്ന വി. മിഖായേൽ മാലാഖയുടെ വലിയ രൂപം യാത്രക്കാരെ അമ്പരപ്പിക്കാറുണ്ട്. പൂർണ്ണമായും സ്റ്റെയിൻലെസ് സ്റ്റീൽ കൊണ്ട് നിർമ്മിച്ച, 62 അടി ഉയരവും 15 ടൺ ഭാരവുമുള്ള ഈ രൂപം അത്യാകർഷകമാണ്. ഒരു കുന്നിൻമുകളിൽ സ്ഥിതിചെയ്യുന്ന ഈ രൂപം ഹൈവേയിൽ നിന്ന് ഒരു മൈൽ മാത്രം അകലെയാണ്.
നാലു നിലകളുള്ള ഒരു കെട്ടിടത്തിനു മുകളിലാണ് ഈ രൂപം സ്ഥാപിച്ചിരിക്കുന്നത്. കിലോമീറ്ററുകൾ അകലെ നിന്നു തന്നെ ഇത് കാണാൻ കഴിയും. കെട്ടിടത്തിന്റെയും രൂപത്തിന്റെയും കൂടി ഉയരം ഏകദേശം 124 അടിയാണ്. ബ്രസീലിലെ റിയോ-ഡി-ജനീറോയിലെ ക്രൈസ്റ്റ് ദി റെഡീമർ രൂപത്തേക്കാൾ അല്പം ചെറുത് മാത്രം.
വി. മിഖായേൽ മാലാഖയുടെ നാമത്തിലുള്ള ലോകത്തിലെ ഏറ്റവും വലിയ മൂന്നാമത്തെ ദൈവാലയമാണിത്. ആദ്യത്തേത് ഇറ്റലിയിലെ ഗാർഗാനോ പർവ്വതത്തിന്റെ ചരിവിലുള്ള രൂപമാണ്. രണ്ടാമത്തേത് ഫ്രാൻസിലെ ഒരു ചെറിയ ദ്വീപിലുള്ള രൂപവും.
