ആധുനിക ലോകത്തിന്റെ സങ്കീർണ്ണമായ പ്രശ്നങ്ങൾ പരിഹരിക്കുന്നതിലും മാനവികതയ്ക്ക് പ്രത്യാശ പകരുന്നതിലും ഗണിതശാസ്ത്രജ്ഞർക്ക് വലിയ പങ്കുവഹിക്കാനുണ്ടെന്ന് ലെയോ പതിനാലാമൻ മാർപാപ്പ. വത്തിക്കാനിൽ അന്താരാഷ്ട്ര ഗണിതശാസ്ത്ര പ്രതിനിധികളുമായി നടത്തിയ കൂടിക്കാഴ്ചയിലാണ് പാപ്പ ഇപ്രകാരം പറഞ്ഞത്.
“ഗണിതശാസ്ത്രം എന്നത് കേവലം അക്കങ്ങളും സൂത്രവാക്യങ്ങളും മാത്രമല്ലെന്നും, അത് സത്യത്തിനായുള്ള അന്വേഷണമാണെന്നും മാർപാപ്പ പറഞ്ഞു. പ്രപഞ്ചത്തിന്റെ ക്രമത്തെയും നിയമങ്ങളെയും മനസ്സിലാക്കാൻ സഹായിക്കുന്ന ഇത്, മനുഷ്യന് ലോകത്തെക്കുറിച്ചുള്ള കൃത്യമായ ധാരണ നൽകുന്നു. ശാസ്ത്രീയമായ അറിവുകൾ സമാധാനത്തിനും നീതിക്കും വേണ്ടി ഉപയോഗിക്കുമ്പോൾ ഗണിതശാസ്ത്രജ്ഞർ ലോകത്തിന് പ്രത്യാശയുടെ പ്രകാശമായി മാറും,” പാപ്പ കൂട്ടിച്ചേർത്തു.
ആധുനിക കാലത്തെ സാങ്കേതിക വിദ്യകളിലും സാമ്പത്തിക ശാസ്ത്രത്തിലും ഗണിതശാസ്ത്രത്തിനുള്ള സ്വാധീനം വളരെ വലുതാണ്. എന്നാൽ ഈ അറിവുകൾ മനുഷ്യന്റെ നന്മയ്ക്കും അന്തസ്സിനും വേണ്ടിയായിരിക്കണം വിനിയോഗിക്കേണ്ടതെന്ന് മാർപാപ്പ ഓർമ്മിപ്പിച്ചു.
