നിയന്ത്രണ രേഖയിൽ ഇന്ന് പുലർച്ചെ ഉണ്ടായ കനത്ത ഷെല്ലാക്രമണങ്ങളിൽ രൂപതാ കോൺവെന്റിന്റെ കാമ്പസിൽ പാക്കിസ്ഥാന്റെ ഷെൽ പതിച്ചതായും ജല ടാങ്കുകൾക്ക് കേടുപാടുകൾ സംഭവിക്കുകയും സോളാർ പാനൽ അടക്കമുള്ള അടിസ്ഥാന സൗകര്യങ്ങൾ നശിപ്പിക്കുകയും ചെയ്തതായും ബിഷപ്പ് ഇവാൻ പെരേര പറഞ്ഞു. ജമ്മു കശ്മീരിലെ പൂഞ്ച് ജില്ലയിൽ നടന്ന ഏറ്റവും പുതിയ ഷെല്ലാക്രമണത്തിൽ കുറഞ്ഞത് 10 സാധാരണക്കാർ കൊല്ലപ്പെടുകയും 33 പേർക്ക് പരിക്കേൽക്കുകയും ചെയ്തു. പരിക്കേറ്റവരെ അടുത്തുള്ള ആശുപത്രികളിലേക്ക് കൊണ്ടുപോയി.
പുരോഹിതന്മാരും സന്യാസിനിമാരും പ്രദേശവാസികളും പരിസരത്തെ ഭൂഗർഭ ഹാളിൽ അഭയം പ്രാപിച്ചതായി ബിഷപ്പ് പെരേര പറഞ്ഞു. ഒരു കത്തോലിക്കാ മാധ്യമത്തോട് സംസാരിച്ച അദ്ദേഹം നിലവിലെ സാഹചര്യത്തിൽ കടുത്ത ആശങ്ക പ്രകടിപ്പിച്ചു.
“ഇന്ന് രാവിലെ പൂഞ്ചിലെ ഞങ്ങളുടെ രൂപതയുടെ നിയന്ത്രണത്തിലുള്ള സ്കൂളിന് തൊട്ടുപിന്നിൽ പാകിസ്ഥാനിൽ നിന്നുള്ള ഒരു ഷെൽ പതിച്ചു. അത് ഞങ്ങളുടെ ഒരു വിദ്യാർഥിയുടെ വീടിന് നേരെ പതിച്ചു. ദാരുണമായി രണ്ട് വിദ്യാർഥികൾക്ക് ജീവൻ നഷ്ടപ്പെട്ടു അവരുടെ മാതാപിതാക്കൾക്ക് ഗുരുതരമായി പരിക്കേറ്റു” – അദ്ദേഹം പറഞ്ഞു. “ഭാഗ്യവശാൽ, സ്കൂളുകൾ അടച്ചിരുന്നു, ഇത് വിദ്യാർഥികൾക്കും ജീവനക്കാർക്കും ഇടയിൽ കൂടുതൽ നാശനഷ്ടങ്ങളുണ്ടാകുന്നത് ഒഴിവാക്കി.
പുലർച്ചെ 2:30 ഓടെ ആരംഭിച്ച മൊബൈൽ നെറ്റ്‌വർക്ക് വിച്ഛേദവും പ്രാദേശിക വൈദ്യുതി തടസ്സവും പ്രതിസന്ധി കൂടുതൽ സങ്കീർണ്ണമാക്കി, ദുരിതബാധിത പ്രദേശങ്ങളിലെ ആശയവിനിമയ സംവിധാനങ്ങളും തടസ്സപ്പെട്ടിരിക്കുകയാണ്.
ഇന്ത്യ-പാകിസ്ഥാൻ അതിർത്തിയിൽ നിന്ന് ഏകദേശം 25 കിലോമീറ്റർ അകലെ സ്ഥിതിചെയ്യുന്ന ജമ്മുപ്രദേശം ശാന്തമായി തുടരുകയാണെന്നും ആളുകളുടെയും വാഹനങ്ങളുടെയും സാധാരണ ചലനം ഉണ്ടെന്നും ബിഷപ്പ് പെരേര അഭിപ്രായപ്പെട്ടു.
“ജമ്മുവും ശ്രീനഗറും ഇപ്പോൾ ഏറെക്കുറെ ശാന്തമാണെങ്കിലും ദുർബല പ്രദേശങ്ങളിൽ നിന്ന് ആളുകളെ ഒഴിപ്പിക്കൽ, ജമ്മു കശ്മീരിലുടനീളമുള്ള വിദ്യാഭ്യാസ സ്ഥാപനങ്ങൾ അടച്ചുപൂട്ടൽ എന്നിവ ഉൾപ്പെടെയുള്ള മുൻകരുതൽ നടപടികൾ അധികൃതർ സ്വീകരിച്ചിട്ടുണ്ട്” – അദ്ദേഹം പറഞ്ഞു.
“സ്ഥിതിഗതികൾ ഉടൻ സ്ഥിരത കൈവരിക്കുമെന്നും സമാധാനം പുനഃസ്ഥാപിക്കപ്പെടുമെന്നും ഞങ്ങൾ പ്രതീക്ഷിക്കുകയും പ്രാർഥിക്കുകയും ചെയ്യുന്നു” എന്ന പ്രതീക്ഷാജനകമായ കുറിപ്പോടെയാണ് അദ്ദേഹം അവസാനിപ്പിച്ചത്.
