ക്രൈസ്തവ വിശ്വാസത്തെ രൂപപ്പെടുത്തിയ ചരിത്രപരമായ നിഖ്യാ കൗൺസിലിന്റെ 1,700-ാം വാർഷികത്തോടനുബന്ധിച്ചുള്ള ചടങ്ങുകളിൽ ഫ്രാൻസിസ് മാർപാപ്പ പങ്കെടുക്കുന്നതിനുള്ള പദ്ധതികൾ എക്യുമെനിക്കൽ പാത്രിയാർക്കീസ് ബാർത്തലോമിയോ ഒന്നാമൻ ആസൂത്രണം ചെയ്യുന്നു. ഇതു സംബന്ധിച്ച് ഔദ്യോഗിക പ്രഖ്യാപനങ്ങളൊന്നും ഉണ്ടായിട്ടില്ല. എങ്കിലും 2025-ൽ, ഇപ്പോൾ ഇസ്‌നിക് എന്നറിയപ്പെടുന്ന നിഖ്യയിൽ ഒരു കത്തോലിക്കാ-ഓർത്തഡോക്സ് ഉച്ചകോടി നടക്കുമെന്ന് പാത്രിയാർക്കീസ് ബർത്തലോമിയോ പ്രത്യാശ പ്രകടിപ്പിച്ചു.
പാത്രിയാർക്കീസ് ബർത്തലോമിയോയും ഫ്രാൻസിസ് മാർപാപ്പയും ഈ ആശയം ആദ്യമായി ചർച്ച ചെയ്തത് 2014 മുതലാണ്. അതേത്തുടർന്ന് സംയുക്ത ആഘോഷത്തിൻ്റെ പദ്ധതികൾ ആവിഷ്ക്കരിച്ചു തുടങ്ങി. 2025-ൽ നിഖ്യ സന്ദർശിക്കാനുള്ള ആഗ്രഹം മാർപ്പാപ്പ പ്രകടിപ്പിച്ചിരുന്നു.
എ. ഡി. 325-ൽ നടന്ന നിഖ്യാ കൗൺസിൽ, ക്രൈസ്തവ ചരിത്രത്തിലെ ഒരു സുപ്രധാന നിമിഷമായിരുന്നു. 2025 ലെ വാർഷികം കത്തോലിക്കാ, ഓർത്തഡോക്സ് സഭകൾക്ക് വലിയ ഐക്യത്തിലേക്ക് നീങ്ങാനുള്ള അവസരമാണ് നൽകുന്നത്. ഇരുസഭകളും ഈസ്റ്റർ ആഘോഷിക്കാൻ ഒരു പൊതു തീയതി കണ്ടെത്താനുള്ള സാധ്യതയെ ഫ്രാൻസിസ് മാർപാപ്പ ഇതിലൂടെ ഉയർത്തിക്കാട്ടുന്നു.
പരിശുദ്ധ സിംഹാസനം ഔദ്യോഗികമായി ഈ യാത്ര പ്രഖ്യാപിച്ചിട്ടില്ലെങ്കിലും, പാത്രിയാർക്കീസ് ബർത്തലോമിയോയുടെ സമീപകാല പ്രസ്താവന സൂചിപ്പിക്കുന്നത് നിഖ്യയിൽ ഇരുനേതാക്കളും തമ്മിലുള്ള ചരിത്രപരമായ കൂടിക്കാഴ്ചയ്ക്കുള്ള പദ്ധതികൾ പുരോഗമിക്കുകയാണെന്നാണ്.
