ചാഡിലെ അതിർത്തിപ്പട്ടണമായ ടിനിൽ മാർച്ച് 18 ബുധനാഴ്ച വൈകുന്നേരം സുഡാൻ നടത്തിയ ഡ്രോൺ ആക്രമണത്തിൽ 15 പേർ കൊല്ലപ്പെട്ടതായി പ്രാദേശിക വൃത്തങ്ങൾ അറിയിച്ചു. ഒരു മരണാനന്തര ചടങ്ങിൽ ആളുകൾ ഒത്തുകൂടിയപ്പോഴാണ് ആക്രമണമുണ്ടായതെന്ന് പ്രാദേശിക അധികൃതരെ ഉദ്ധരിച്ച് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.
“ചാഡിലെ ടിനിൽ നടന്ന ഒരു ശവസംസ്കാര ചടങ്ങിനിടെ സുഡാനിൽ നിന്നുള്ള ഒരു ഡ്രോൺ ആക്രമണത്തിൽ 15 നും 16 നുമിടയിൽ ആളുകൾ കൊല്ലപ്പെട്ടതിൽ ഞങ്ങൾ ഖേദിക്കുന്നു” – പേര് വെളിപ്പെടുത്താൻ ആഗ്രഹിക്കാത്ത ഒരു മുതിർന്ന പ്രാദേശിക ഉദ്യോഗസ്ഥൻ പറഞ്ഞു. സുഡാനിലെ അർധസൈനിക വിഭാഗമായ റാപ്പിഡ് സപ്പോർട്ട് ഫോഴ്സ് (RSF) ആണ് ആക്രമണത്തിനു പിന്നിലെന്നാണ് പ്രാഥമിക നിഗമനം. സുഡാൻ സൈന്യവും ആർഎസ്എഫും തമ്മിൽ കഴിഞ്ഞ ഒരുവർഷമായി തുടരുന്ന ആഭ്യന്തരയുദ്ധം അയൽരാജ്യമായ ചാഡിലേക്കും പടരുന്നതിന്റെ തെളിവാണ് ഈ സംഭവം.
ആക്രമണത്തെത്തുടർന്ന് ചാഡ് പ്രസിഡന്റ് മഹാമത്ത് ഇദ്രിസ് ഡെബി അടിയന്തര സുരക്ഷായോഗം വിളിച്ചുചേർത്തു. സുഡാനുമായുള്ള 1,400 കിലോമീറ്റർ നീളുന്ന അതിർത്തി പൂർണ്ണമായും അടയ്ക്കാൻ അദ്ദേഹം ഉത്തരവിട്ടു. അതിർത്തി കടന്നുള്ള ഏതൊരു ആക്രമണത്തിനും ശക്തമായ തിരിച്ചടി നൽകാൻ ചാഡ് സൈന്യത്തിന് അദ്ദേഹം നിർദേശം നൽകിയിട്ടുണ്ട്.
