എന്തുകൊണ്ടാണ് ഇസ്രായേൽ ഗാസയിലേക്കുള്ള മാനുഷിക സഹായങ്ങൾക്ക് നിയന്ത്രണങ്ങൾ ഏർപ്പെടുത്തുന്നത്?

2023 ഒക്ടോബർ ഏഴിന് ഇസ്രയേലിനും ലോകത്തിനും കറുത്ത ദിനമായിരുന്നു. ഹമാസ് നടത്തിയ ഒരു ഭീകരാക്രമണത്തോടെ രാജ്യത്തെ ഒന്നടങ്കം കണ്ണീരിലാഴ്ത്തിയ ആ ദിനത്തിൽ 1,200-ലധികം പേർ കൊല്ലപ്പെടുകയും 253 പേരെ ബന്ദികളാക്കുകയും ചെയ്ത കാര്യം ലോകം മറന്നിട്ടില്ല. നിലവിൽ വെടിനിർത്തൽ പ്രഖ്യാപിച്ചെങ്കിലും ഇസ്രായേൽ ഗാസയിലേക്കുള്ള മാനുഷിക സഹായങ്ങൾക്ക് നിയന്ത്രണം ഏർപെടുത്തുന്നതിനെ ലോകം അപലപിക്കുന്നുണ്ട്. എന്നാൽ എന്തുകൊണ്ടാണ് ഇസ്രായേൽ ഗാസയിലേക്കുള്ള മാനുഷിക സഹായങ്ങൾക്ക് നിയന്ത്രണങ്ങൾ ഏർപ്പെടുത്തുന്നത്? തുടർന്ന് വായിക്കുക.

ഹമാസ് ഭീകരാക്രമണത്തിനുശേഷം, 1.3 ദശലക്ഷം ടണ്ണിലധികം മാനുഷിക സഹായം സഖ്യകക്ഷികളുടെ സഹായത്തോടെ പലസ്തീൻ പൗരൻമാർക്കായി ഇസ്രായേൽ എത്തിച്ചിട്ടുണ്ട്. നിലവിൽ 58 ബന്ദികൾ ഹമാസിന്റെ പക്കൽ ഉണ്ടായിരുന്നിട്ടുകൂടിയും ഇവരെ മോചിപ്പിക്കുന്ന കരാറുകളിൽ ഏർപ്പെടാൻ ഹമാസ് തായാറാകുന്നില്ല. എങ്കിലും ബന്ദികളെ വിട്ടു നൽകുന്ന മുറയ്ക്ക് കൂടുതൽ സഹായങ്ങളെത്തിക്കുമെന്നു ഇസ്രായേൽ വാഗ്ദാനം ചെയ്തിട്ടുണ്ട്. യു എസ്  പിന്തുണയുള്ള ഈ നിർദേശം ഹമാസ് അംഗീകരിച്ചിട്ടില്ല. എങ്കിലും ലോകം മുഴുവൻ ഇസ്രയേലിനെ വിമർശിക്കുമ്പോഴും ഗാസയിലേയ്ക്ക് വെള്ളം ഒഴുകുന്നത് തുടരുന്നുവെന്നു ശ്രദ്ധിക്കേണ്ടതാണ്.

യുദ്ധം തുടങ്ങിയതിനുശേഷം അമേരിക്കയും ഇസ്രായേലും മറ്റ് ഏജൻസികളും ഗാസയിലേക്ക് എത്രമാത്രം മാനുഷിക സഹായം അയച്ചു?

2023 ഒക്ടോബർ 18 ന്, ഹമാസിന്റെ ക്രൂരമായ ഭീകരാക്രമണത്തിന് 11 ദിവസങ്ങൾക്ക് ശേഷം ഒരു വലിയ മാനുഷിക പ്രതിസന്ധി ഗാസയിലുണ്ടായി. നിരപരാധികളായ പലസ്തീൻ ജീവൻ രക്ഷിക്കുന്നതിനുമായി ഈജിപ്തിൽ നിന്ന് ഗാസയിലേക്ക് മാനുഷിക സഹായം പ്രവേശിക്കാൻ ഇസ്രായേൽ സമ്മതിച്ചു. തെക്കൻ ഭാഗത്തേക്ക് ജീവൻ രക്ഷിക്കുന്ന പലായനങ്ങളെ പ്രോത്സാഹിപ്പിക്കുന്നതിനായി ഇസ്രായേൽ തെക്കൻ ഗാസയിലേക്കുള്ള ജലവിതരണവും പുനരാരംഭിച്ചു.

യുദ്ധത്തിന് മുമ്പ്, ഗാസയിലെ ജലവിതരണത്തിന്റെ 90 ശതമാനവും ഇസ്രായേലിലേക്ക് കിഴക്കൻ മെഡിറ്ററേനിയൻ തീരത്ത് വ്യാപിച്ചുകിടക്കുന്ന തീരദേശ ജലാശയമായ കോസ്റ്റൽ അക്വിഫർ ബേസിനിൽ നിന്നോ ഭൂഗർഭജല കിണറുകളിൽ നിന്നോ ആയിരുന്നു. ബാക്കി 10% ജലവിതരണം ചെറുകിട ഡീസലൈനേഷൻ യൂണിറ്റുകളിൽ നിന്നോ ഇസ്രായേലിന്റെ ദേശീയ ജല കമ്പനിയായ മെക്കോറോട്ടിൽ നിന്നോ ആണ് ലഭിക്കുന്നത്.

ഗാസയിലേക്ക് പ്രവേശിക്കുന്ന എല്ലാ സഹായങ്ങളും നിറ്റ്സാനയിലോ കെറെം ഷാലോം ക്രോസിംഗിലോ ഇസ്രായേലി സുരക്ഷാ പരിശോധനയ്ക്ക് വിധേയമാക്കുന്നു. അവിടെ നിന്നാണ് ഗാസ മുനമ്പിലേക്ക് സഹായം അയയ്ക്കുന്നത്.

ഇക്കഴിഞ്ഞ മാർച്ച് മാസം വരെ 66,000-ത്തിലധികം ട്രക്കുകൾ 1.3 ദശലക്ഷം ടണ്ണിലധികം സഹായം ഗാസയിൽ എത്തിച്ചിട്ടുണ്ട്. താൽക്കാലിക വെടിനിർത്തൽ സമയത്ത് 25,000 ട്രക്കുകൾ ഉൾപ്പെടെയുള്ള കണക്കാണ് ഇത്. ചരക്കുകളിൽ 1,010,613 ടൺ ഭക്ഷണം, 53,040 ടൺ വെള്ളം, 30,430 ടൺ മെഡിക്കൽ സാധനങ്ങൾ, 104,792 ടൺ ഷെൽട്ടർ ഉപകരണങ്ങൾ എന്നിവ ഉൾപ്പെടുന്നു. കഴിഞ്ഞ 12 മാസത്തിനുള്ളിൽ മാത്രം ഏകദേശം 26.3 ദശലക്ഷം ലിറ്റർ ഇന്ധനവും ഏകദേശം 22,000 ടൺ പാചക വാതകവും എത്തിച്ചു.

കൂടാതെ, വടക്കൻ ഗാസയിൽ 10,450 ലധികം സഹായ വസ്തുക്കൾ വ്യോമമാർഗം വിതറാൻ യു എസ്, ഫ്രാൻസ്, ബെൽജിയം, ഈജിപ്ത്, യുണൈറ്റഡ് അറബ് എമിറേറ്റ്സ്, ജോർദാൻ എന്നീ രാജ്യങ്ങളെ ഇസ്രായേൽ സ്വാഗതം ചെയ്തു.

സഹായ സാധനങ്ങൾ കൊണ്ടുപോകുന്ന ട്രക്കുകളെ ഹമാസ് അക്രമാസക്തമായി മറികടക്കുന്നതിന്റെയും, ഗ്രൂപ്പിന്റെ സ്വന്തം സംഭരണശാലകളിലേക്ക് സാധനങ്ങൾ കൊണ്ടുപോകുന്നതിന്റെയും, അവർ ബിസിനസ്സ് ചെയ്യാൻ തിരഞ്ഞെടുക്കുന്ന ചില വിൽപ്പനക്കാർക്ക് അമിത വിലയ്ക്ക് വിൽക്കുന്നതിന്റെയും ചിത്രങ്ങൾ ലഭ്യമായിട്ടുണ്ട്. ഈ രീതി വീണ്ടും ഹമാസ് എന്ന ഭീകര സംഘടനയ്ക്ക് ദശലക്ഷക്കണക്കിനു ഡോളറിന്റെ വരുമാനം ഉണ്ടാക്കിയിട്ടുണ്ട്.

അതേസമയം, തെക്കൻ ഗാസ മുനമ്പിൽ ഭക്ഷ്യവിതരണം സുസ്ഥിരമാണെന്ന് ഇസ്രായേൽ വിലയിരുത്തുന്നു. അവിടെ വിപണികൾ തിരക്കേറിയതും സഹായ ഏജൻസികളുടെ വെയർഹൗസുകളിൽ സ്റ്റോക്കുകൾ കുന്നുകൂടിയിട്ടുമുണ്ട്.

യുദ്ധനിയമങ്ങൾ അനുസരിച്ച്, രാജ്യങ്ങൾ ശത്രുക്കൾക്ക് ഭക്ഷണം, വെള്ളം, വൈദ്യുതി, ഗ്യാസോലിൻ എന്നിവ നൽകേണ്ടതില്ല എന്നത് ശ്രദ്ധിക്കേണ്ടതാണ്. ഇവയെല്ലാം ശത്രുവിന്റെ പോരാട്ട ശേഷിയെ പിന്തുണയ്ക്കുന്നു. എന്നിരുന്നാലും, കനത്ത പോരാട്ടത്തിനിടയിലും, ഇസ്രായേൽ ഗാസയ്ക്ക് വൈദ്യുതി, വെള്ളം, ഭക്ഷണം, മരുന്ന് എന്നിവ നൽകുന്നത് തുടരുന്നു. അതും സ്വന്തം മണ്ണിൽ ഇതുവരെ സംഭവിച്ചതിൽ വച്ച് ഏറ്റവും ക്രൂരമായ കൂട്ടക്കൊലയ്ക്ക് വിധേയമായിട്ടും അവർ അത് തുടരുന്നു എന്നതാണ് ശ്രദ്ധേയം.

ഇസ്രായേലും അമേരിക്കയും മറ്റ് ഏജൻസികളും ഗാസയിലേക്ക് ഉൽപ്പന്നങ്ങളും സേവനങ്ങളും നൽകാൻ തുടങ്ങിയത് എപ്പോഴാണ്?

ഇസ്രായേലിന്റെ നാശത്തിന് ഹമാസ് ഭീകര സംഘടനയുടെ പ്രവർത്തനങ്ങൾ ഉണ്ടായിരുന്നിട്ടും, 2007 ൽ ഹമാസ് തീരദേശ പ്രദേശം ഏറ്റെടുത്തതിനുശേഷം ഗാസയിലെ പലസ്തീൻ സിവിലിയന്മാർക്ക് ഇസ്രായേലിൽ നിന്നും സഖ്യകക്ഷികളിൽ നിന്നും സഹായം ലഭിച്ചു.

ആ വർഷങ്ങൾ മുതൽ തന്നെ, ഇസ്രായേൽ അതിന്റെ കെരെം ഷാലോം ക്രോസിംഗ് വഴി ഗാസയിലെ 63% ആളുകൾക്ക് ഭക്ഷണവും മറ്റ് സഹായ മാർഗങ്ങളും പ്രദേശത്തേക്ക് എത്തിക്കുന്നതിന് നിരവധി അന്താരാഷ്ട്ര ഗ്രൂപ്പുകളുമായി ചേർന്ന് പ്രവർത്തിച്ചിട്ടുണ്ട്. സ്കൂൾ സാധനങ്ങൾ, കളിപ്പാട്ടങ്ങൾ, ഇലക്ട്രോണിക് ഉപകരണങ്ങൾ, ഫാർമസ്യൂട്ടിക്കൽസ് എന്നിവ വരെ ദൈനംദിന ജീവിതത്തിനുതകുന്ന ടൺ കണക്കിന് ഉൽപ്പന്നങ്ങൾക്ക് ഇസ്രായേൽ സൗകര്യമൊരുക്കിയിട്ടുണ്ട്.

ഗാസയിലെ പ്രകൃതിദത്ത ജലാശയങ്ങൾ വറ്റിപ്പോയപ്പോൾ ഇസ്രായേൽ വൈദ്യുതിയും വെള്ളവും വിതരണം ചെയ്തു. കൂടാതെ, ഹമാസിന്റെ നിയന്ത്രണം മൂലമുണ്ടായ മാനുഷികവും സാമ്പത്തികവുമായ ദുരിതത്തിന് ആശ്വാസം നൽകുന്നതിനായി ഏകദേശം 17,000 ഗാസ നിവാസികൾക്ക് ഇസ്രായേൽ സമൂഹങ്ങളിൽ പ്രവേശിക്കാനും ജോലി ചെയ്യാനും ഇസ്രായേൽ അനുമതി നൽകിയിരുന്നു.

ഇതിനുപുറമെ, കഴിഞ്ഞ നിരവധി വർഷങ്ങളായി ഗാസ മുനമ്പിന് കോടിക്കണക്കിന് ഡോളറിന്റെ മാനുഷിക സഹായം നൽകിയിട്ടുണ്ട്. ഇതിൽ യു എസിൽ നിന്നുള്ള 400 മില്യൺ ഡോളറും ഖത്തറിൽ നിന്നുള്ള 1 ബില്യൺ ഡോളറും ഉൾപ്പെടുന്നു. എന്നാൽ ഇതിൽ ഞെട്ടിക്കുന്ന കാര്യം പലസ്തീൻ ജനതയ്ക്കായി ഉദ്ദേശിച്ചിരുന്ന ആ മാനുഷിക സഹായത്തിന്റെ ഭൂരിഭാഗവും ഹമാസ് സ്വന്തം ആവശ്യങ്ങൾക്കായി തിരിച്ചുവിട്ടു എന്നതാണ്. ഇത് ഹമാസിന് 350 മൈലിലധികം ഭീകര തുരങ്കങ്ങളും റോക്കറ്റ് ഫാക്ടറികളും നിർമ്മിക്കുന്നത് പോലുള്ള തീവ്രവാദ പ്രവർത്തനങ്ങൾക്ക് ഉപകരിച്ചു.

2018-ൽ പ്രസിഡന്റ് ഡൊണാൾഡ് ട്രംപ് പലസ്തീൻ സഹായം വെട്ടിക്കുറച്ചതിനുശേഷം, 2021-ൽ ബൈഡൻ ഭരണകൂടം ഗാസയിലെയും വെസ്റ്റ് ബാങ്കിലെയും പലസ്തീനികൾക്കുള്ള സഹായം പുനഃസ്ഥാപിച്ചു. ആ വർഷം യു എസ് 360 മില്യണിലധികം ഡോളറാണ് അയച്ചത്.

മനുഷ്യത്വപരമായ സഹായം സാധാരണക്കാരിലേക്ക് എത്തുന്നുണ്ടെന്ന് ഇസ്രായേൽ എങ്ങനെയാണ് ഉറപ്പാക്കിയത്?

ഭീകര സംഘടനകളുടെ ആയുധക്കടത്ത് തടയുന്നതിനും വസ്തുക്കൾ ദുരുപയോഗം ചെയ്യുന്നത് നിരീക്ഷിക്കുന്നതിനുമായി ഇസ്രായേലും ഈജിപ്തും ഗാസയിൽ കർശനമായ നടപടികൾ സ്വീകരിച്ചിട്ടുണ്ട്. പ്രത്യേക അതിർത്തി കടന്നുള്ള വഴികളിലൂടെയാണ് സഹായങ്ങൾ കൈമാറ്റം ചെയ്യുന്നത്. സുരക്ഷാ നടപടികളുടെ ഭാഗമായി വസ്തുക്കളുടെ കയറ്റുമതി സൂക്ഷ്മമായി പരിശോധിക്കുന്നു. എന്നിരുന്നാലും, സഹായത്തിന്റെ ഒരു ഭാഗം ഹമാസിന്റെ കൈകളിൽ അവരുടെ മുൻഗണനകൾക്കനുസരിച്ച് വിതരണം ചെയ്യുന്നതിനായി എത്തുന്നതായി ഇസ്രായേലി സുരക്ഷാ ഏജൻസി റിപ്പോർട്ട് ചെയ്തിട്ടുണ്ട്.

2023 ഒക്ടോബർ 21 മുതൽ, ഈജിപ്തിനും ഗാസ മുനമ്പിനും ഇടയിലുള്ള റാഫ ക്രോസിംഗ് വഴി ഗാസ മുനമ്പിലേക്ക് മാനുഷിക സഹായം എത്തിക്കുന്നതിന് ഇസ്രായേൽ സൗകര്യമൊരുക്കിയിട്ടുണ്ട്. എല്ലാ ദിവസവും, ഐ ഡി എഫ് പോരാട്ടം താത്കാലികമായി നിർത്തിവെയ്ക്കുകയും സഹായ കൈമാറ്റത്തിനായി മാനുഷിക ഇടനാഴികൾ തുറക്കുകയും ചെയ്തിരുന്നു എന്നുള്ളതും പ്രസക്തമായ കാര്യമാണ്.

ഗാസയിലേക്ക് മാനുഷിക സഹായം എത്തുന്നതിനുള്ള തടസ്സങ്ങളെക്കുറിച്ചുള്ള തർക്കം എന്താണ്?

ഗാസയിലെ വർധിച്ചുവരുന്ന മോശമായ മാനുഷിക സാഹചര്യത്തെക്കുറിച്ച് യൂറോപ്യൻ യൂണിയൻ, ഐക്യരാഷ്ട്രസഭ, മറ്റ് അന്താരാഷ്ട്ര സഹായ ഏജൻസികൾ തുടങ്ങി നിരവധി അന്താരാഷ്ട്ര ഉദ്യോഗസ്ഥർ, യു എസ് ഉദ്യോഗസ്ഥർ എന്നിവർ ആശങ്കകൾ ഉന്നയിച്ചിട്ടുണ്ട്. പ്രത്യേകിച്ചും, ഗാസ മുനമ്പിലെ പലസ്തീനികൾക്കുള്ള സഹായം എങ്ങനെ സ്വീകരിക്കുന്നു, പരിശോധിക്കുന്നു, വിതരണം ചെയ്യുന്നു എന്നതിനെക്കുറിച്ച് വലിയ തർക്കം നടക്കുന്നതിനോടൊപ്പം ഗാസയിലേയ്ക്ക് മതിയായ സഹായം ഇസ്രായേൽ തടയുന്നുണ്ടെന്ന് ചില ആരോപണങ്ങളുണ്ട്.

ഈ ആരോപണങ്ങൾക്കൊപ്പം, അതിർത്തി കടന്നുള്ള സ്ഥലങ്ങളിൽ സഹായ ട്രക്കുകളുടെ നീണ്ട നിരകളുടെയും, ഗാസയിൽ കുന്നുകൂടിക്കിടക്കുന്ന സാധനങ്ങളുടെയും ചിത്രങ്ങളും ഉണ്ട്, അവയ്ക്ക് ആവശ്യക്കാരായ പലസ്തീൻ ജനതയിലേക്ക് എത്തിച്ചേരാൻ കഴിയുന്നില്ല എന്നാണു ഇത് തെളിയിക്കുന്നത്. അതുകൊണ്ട് തന്നെ സഹായത്തിന്റെ സമീപകാല കുതിച്ചുചാട്ടം ഇസ്രായേൽ നിർത്തിവച്ചത് വലിയ പ്രതിഷേധത്തിന് കാരണമായിട്ടുണ്ട്.

ഹമാസ്, മാനുഷിക സഹായം വഴിതിരിച്ചുവിടുന്നതിൽ ഇസ്രായേൽ ആശങ്ക പ്രകടിപ്പിച്ചിരുന്നു. ഇസ്രായേൽ സഹായങ്ങൾ നിർത്തലാക്കുന്നു എന്ന് വ്യാപക പ്രതിഷേധമുണ്ടായപ്പോൾ തീര പ്രദേശത്തേയ്ക്ക് പ്രവേശിക്കാൻ കഴിയുന്നതും നൽകുന്നതുമായ സഹായത്തിന് പരിധിയില്ലെന്നാണ് ഇസ്രായേൽ ഇതിനെക്കുറിച്ച് പ്രതികരിച്ചത്. ഗാസയിലെ പ്രവേശന കവാടങ്ങളിൽ എത്തുന്ന ചരക്കുകൾ പരിശോധിക്കുന്നതിനുള്ള സൗകര്യങ്ങൾ ഇസ്രായേൽ നിലനിർത്തിയിട്ടുണ്ട്, അതിൽ ആയുധങ്ങളോ റോക്കറ്റുകളോ നിർമ്മിക്കാൻ ഹമാസിന് ഉപയോഗിക്കാൻ കഴിയുന്ന “ഇരട്ട ഉപയോഗ” വസ്തുക്കളോ ഇല്ലെന്ന് ഉറപ്പാക്കുന്നു.

ഹമാസ് സാധനങ്ങൾ ശേഖരിച്ചുവച്ചിട്ടുണ്ടെന്നും അവ സാധാരണക്കാരിൽ നിന്ന് തടഞ്ഞുവെച്ചിട്ടുണ്ടെന്നും ഇസ്രായേൽ പറയുന്നു. യു എൻ ആർ ഡബ്ല്യു എ പോലുള്ള ചില സഹായ ഏജൻസികൾ ഗാസയ്ക്കുള്ളിൽ സാധനങ്ങൾ വിതരണം ചെയ്യുന്നതിൽ പരാജയപ്പെട്ടതാണ് ദുരിതപൂർണമായ മാനുഷിക സാഹചര്യത്തിന് കാരണമെന്നും ഇസ്രായേൽ പറയുന്നു. ഗാസ ഉൾപ്പെടെ മിഡിൽ ഈസ്റ്റിലുടനീളം പലസ്തീനികളെ പിന്തുണയ്ക്കുന്ന മുൻനിര യു എൻ ഏജൻസിയായ യു എൻ ആർ ഡബ്ല്യു എ യിലെ ജീവനക്കാരും ഒക്ടോബർ 7 ന് ഇസ്രായേലിൽ നടന്ന ഹമാസ് കൂട്ടക്കൊലയിൽ പങ്കാളികളായത് വിമർശനങ്ങൾ നേരിടുന്നു.

ഗാസയിലെ വിതരണ പ്രശ്‌നങ്ങൾക്ക് പരിഹാരം കണ്ടെത്തുന്നതിനായി ലോകമെമ്പാടും ഭക്ഷ്യ സഹായം നൽകുന്ന ഐക്യരാഷ്ട്രസഭ ഏജൻസിയായ വേൾഡ് ഫുഡ് പ്രോഗ്രാമുമായി (WFP) ഇസ്രായേൽ അടുത്ത് പ്രവർത്തിച്ചിട്ടുണ്ടെന്ന് ഐ ഡി എഫ് പറയുന്നു.

ബുദ്ധിമുട്ടുകൾക്കിടയിലും, ഗാസയിലെ സാധാരണ ജനങ്ങൾക്ക് മാനുഷിക സഹായം നൽകുന്നതിനുള്ള പുതിയ രീതികൾ ഇസ്രായേൽ തുടരുമെന്നാണ് നാം പ്രതീക്ഷിക്കേണ്ടത്. യുദ്ധ നയങ്ങൾക്ക് വിരുദ്ധമായി പോലും അളവറ്റ കരുണയോടെ എതിർകക്ഷികളോട് പെരുമാറിക്കൊണ്ടിരിക്കുന്ന ഇസ്രായേൽ സ്വീകരിച്ച നയം ലോക മനസാക്ഷി കുറച്ചുകൂടി ആഴത്തിൽ മനസ്സിലാക്കേണ്ടതാണ്. ഇതിലൂടെയെല്ലാം ഇസ്രായേൽ ലോകത്തോട് വിളിച്ചു പറയുന്നത് ഒരേയൊരു കാര്യമാണ്: ഇത് ഗാസയിലെ ജനങ്ങൾക്കെതിരായ യുദ്ധമല്ല; ഹമാസിനെതിരായ യുദ്ധമാണ്.

സുനീഷ വി. എഫ്.

Reference: https://www.ajc.org/news/what-you-need-to-know-about-israels-humanitarian-aid-to-gaza