മാരകമായ രോഗാവസ്ഥയിൽ നിന്നും മകൾ അദ്ഭുതകരമായി ജീവിതത്തിലേക്ക് തിരിച്ചുവന്നതിനെത്തുടർന്ന് വിയറ്റ്നാമിൽ ബുദ്ധമത വിശ്വാസിയായ അമ്മ കത്തോലിക്കാ വിശ്വാസം സ്വീകരിച്ചു. മധ്യ വിയറ്റ്നാമിലെ ഹ്യൂ നഗരത്തിൽ 34 കാരിയായ ബുയി തി കിം തൻ, മൂന്നുവയസുള്ള തന്റെ മകൾക്ക് ലഭിച്ച രോഗശാന്തിയിലൂടെയാണ് ക്രിസ്തുവിനെ അറിഞ്ഞത്. കഠിനമായ പ്രതിസന്ധി ഘട്ടത്തിൽ ക്രൈസ്തവർ നൽകിയ പിന്തുണയും പ്രാർഥനയുമാണ് തന്നെ ഈ തീരുമാനത്തിലേക്ക് നയിച്ചതെന്ന് അവർ സാക്ഷ്യപ്പെടുത്തുന്നു.
പ്രതീക്ഷയറ്റ നിമിഷങ്ങൾ
ഗുരുതരമായ ആരോഗ്യപ്രശ്നങ്ങളാൽ മാസങ്ങളോളം ആശുപത്രിയിൽ കഴിഞ്ഞിരുന്ന മകളുടെ ജീവൻ രക്ഷിക്കാൻ സാധിക്കില്ലെന്ന് ഡോക്ടർമാർ വിധിയെഴുതിയിരുന്നു. ഈ സാഹചര്യത്തിലാണ് അയൽവാസികളായ കത്തോലിക്കാ കുടുംബങ്ങൾ അവർക്കായി പ്രാർഥിക്കാനും ആത്മീയ പിന്തുണ നൽകാനും മുന്നോട്ടുവന്നത്. “ദൈവമേ, എന്റെ മകളെ രക്ഷിക്കണമേ. നീ അവൾക്ക് എല്ലാ നന്മകളും നൽകുമെന്ന് ഞാൻ വിശ്വസിക്കുന്നു, ഞാൻ നിന്റെ വചനപ്രകാരം ജീവിക്കും,” രോഗം മൂർച്ഛിച്ച വേളയിൽ ഈ ‘അമ്മ പ്രാർഥിച്ചു. ശാസ്ത്രത്തിന് വിശദീകരിക്കാൻ കഴിയാത്ത വിധം മകളുടെ ആരോഗ്യനിലയിൽ പെട്ടെന്നുണ്ടായ പുരോഗതി ഒരു അദ്ഭുതമായാണ് ഈ കുടുംബം കാണുന്നത്.
വിശ്വാസത്തിലേക്കുള്ള ചുവടുവെപ്പ്
2019-ൽ കത്തോലിക്കനായ മാത്യു ഫാൻ വാൻ ഖിയുമായുള്ള അവളുടെ വിവാഹം നടന്നു. എങ്കിലും അവർ ഇരുവരും പരസ്പരം തങ്ങൾ ആയിരിക്കുന്ന മതവിശ്വാസങ്ങളിൽ തുടരാൻ തീരുമാനിക്കുകയായിരുന്നു. മകളുടെ രോഗശാന്തിക്ക് ശേഷം കത്തോലിക്കാ വിശ്വാസത്തെക്കുറിച്ച് കൂടുതൽ പഠിക്കാൻ ഈ അമ്മ തയ്യാറായി. ഇടവകയിലെ വൈദികരുടെയും വിശ്വാസികളുടെയും സഹായത്തോടെ വിശ്വാസ പരിശീലനം പൂർത്തിയാക്കിയ ശേഷമാണ് അവർ ജ്ഞാനസ്നാനം സ്വീകരിച്ചത്. “ദൈവത്തിന്റെ സ്നേഹവും കരുണയും നേരിട്ട് അനുഭവിച്ചറിഞ്ഞ എനിക്ക് ഇനി മറ്റൊരു വഴിയില്ല,” അവർ വികാരാധീനയായി പറഞ്ഞു.
കത്തോലിക്കാ സഭയുടെ കാരുണ്യപ്രവർത്തനങ്ങളും പ്രാർഥനാ കൂട്ടായ്മകളും വിയറ്റ്നാമിലെ അക്രൈസ്തവർക്കിടയിൽ വലിയ സ്വാധീനം ചെലുത്തുന്നു. കത്തോലിക്കയായ ശേഷമുള്ള തന്റെ ജീവിതത്തിൽ സമാധാനവും പ്രത്യാശയും നിറഞ്ഞതായി ഈ അമ്മ സാക്ഷ്യപ്പെടുത്തുന്നു.
വിയറ്റ്നാമിൽ കത്തോലിക്കാ സഭ നേരിടുന്ന വെല്ലുവിളികൾക്കിടയിലും ഇത്തരം വ്യക്തിപരമായ സാക്ഷ്യങ്ങൾ വിശ്വാസികൾക്ക് വലിയ ആവേശമാണ് നൽകുന്നത്. ആത്മീയമായ അന്വേഷണങ്ങൾക്കും ദൈവാനുഭവങ്ങൾക്കും മതം ഒരു തടസ്സമല്ലെന്ന് ഈ സംഭവം ഒരിക്കൽ കൂടി തെളിയിക്കുന്നു.
