തിരുക്കുടുംബം. ദൈവം ലോകത്തിനു നൽകിയ മാതൃകാകുടുംബം. ജീവിതത്തിൽ ദൈവത്തിന് പ്രാധാന്യം നൽകി ദൈവഹിതത്തിന് കാതോർത്ത് മുന്നോട്ടുപോയ കുടുംബം. ദൈവഹിതത്തിന് പൂർണ്ണമായും ആമ്മേൻ പറഞ്ഞ മറിയം. ദർശനത്തിലൂടെ സംസാരിച്ച ദൈവത്തിന്റെ വാക്കുകളെ ശങ്കകൂടാതെ സ്വീകരിച്ച യൗസേപ്പിതാവ്. ദൈവഹിതത്തിനായി തന്നെ പൂർണ്ണമായും സമർപ്പിച്ച ഈശോ.
ചുറ്റും എന്തൊക്കെ പ്രതിസന്ധികളുണ്ടായാലും അവയെയൊക്കെ അതിജീവിക്കാൻ, ശക്തമായ അടിത്തറയുള്ള ഒരു കുടുംബത്തിനു കഴിയും. സമ്പൂർണ്ണ സമർപ്പണത്തിന്റെ മാതൃകയായ തിരുക്കുടുംബം ഇന്നത്തെ കുടുംബങ്ങൾക്ക് പകർന്നുതരുന്ന മൂന്ന് പാഠങ്ങളുണ്ട്. അവ ചുവടെ ചേർക്കുന്നു:
1. വിശ്വാസം നൽകുകയും സ്വീകരിക്കുകയും ചെയ്യുക
കുടുംബജീവിതത്തിൽ ഏറ്റവും പ്രധാനപ്പെട്ട ഒന്നാണ് പരസ്പരമുള്ള വിശ്വാസം. പരസ്പരമുള്ള വിശ്വാസത്തിന്റെ വലിയൊരു മാതൃകയാണ് തിരുക്കുടുംബം പകർന്നുതരുന്നത്. പ്രതിസന്ധികളിലും പ്രശ്നങ്ങളിലും പരസ്പരമുള്ള വിശ്വാസം പകരുന്ന ധൈര്യം വളരെ വലുതാണ്. തുറവിയുള്ള ഒരു സംസാരം അതിന് ആവശ്യമാണ്.
2. പ്രോത്സാഹനം
ജീവിതത്തിൽ പല പ്രതിസന്ധികളും ഉണ്ടാവുക സാധാരണമാണ്. അത്തരം സമയങ്ങളിൽ തളരാതെ പങ്കാളിയുടെയും മക്കളുടെയും മാതാപിതാക്കളുടെയും കരംപിടിക്കാൻ ഒരോരുത്തർക്കും കഴിയണം. പരസ്പരം പ്രോത്സാഹിപ്പിച്ചുകൊണ്ടുള്ള ഒരു ജീവിതം കുടുംബങ്ങളെ കൂടുതൽ ശക്തമാക്കും.
3 . എപ്പോഴും ഒപ്പമുണ്ടാവുക
എപ്പോഴും കുടുംബത്തോടൊപ്പമുണ്ടാവുക. അത് വളരെ വലിയൊരു കാര്യമാണ്. ഇപ്പോഴും കൂടെയിരിക്കുക എന്നുമാത്രമല്ല അതിനർഥം. ജോലിക്കായി വിവിധ സ്ഥലങ്ങളിൽ ആയിരിക്കുമ്പോഴും കുടുംബത്തിന് ആവശ്യമായ പിന്തുണ നൽകാൻ ശ്രമിക്കണം. കുടുംബാംഗങ്ങളുമായി സംസാരിക്കാനും അവരോടൊപ്പം ആയിരിക്കാനും സമയം കണ്ടെത്തണം. അങ്ങനെയൊരു പിന്തുണയുള്ളപ്പോൾ പ്രതിസന്ധികളിൽ അവർ പതറില്ല, തളരില്ല. തിരുക്കുടുംബം കാണിച്ചുതരുന്നതും ഇതുതന്നെയാണ്.
