മറിയം: പ്രാർഥനയിൽ ശക്തയായ സ്ത്രീ
2020 നവംബർ പതിനെട്ടാം തീയതി ഫ്രാൻസിസ് പാപ്പ നടത്തിയ പ്രാർഥനയെക്കുറിച്ചുള്ള മതബോധനത്തിന്റെ ഭാഗമാണ് ഇന്നത്തെ മരിയ വിചാരം.
1. മറിയത്തിന്റെ എളിമയും പ്രാർഥനാനിരതവുമായ മനോഭാവം
ലോകം അറിയപ്പെടുന്നതിനു മുമ്പുതന്നെപരിശുദ്ധ കന്യകാമറിയം ആഴമേറിയതും നിശബ്ദവുമായ പ്രാർഥനയുടെ ഒരു ജീവിതമാണ് നയിച്ചു പോന്നത്. നസ്രത്തിലെ ഒരു പെൺകുട്ടിയെന്ന നിലയിൽ, അവൾ ദൈവവുമായി നിരന്തരമായ സംഭാഷണത്തിലായിരുന്നു. തന്നെ ഏൽപ്പിച്ച അസാധാരണമായ ദൗത്യത്തിനായി അവളുടെ ഹൃദയത്തെ അവൾ ഒരുക്കി. മംഗളവാർത്താ വേളയിൽ ദൈവത്തോടുള്ള മറിയത്തിന്റെ ‘അതെ’ പറച്ചിൽ അവന്റെ ഇഷ്ടത്തോടുള്ള അവളുടെ തുറന്ന മനസ്സിനെ പ്രതിഫലിപ്പിക്കുന്നു. വിശ്വാസത്തിന്റെയും വിധേയത്വത്തിന്റെയും മഹത്തായ ഒരു മാതൃക. ലളിതമായ ഒരു ഹൃദയത്തോടെ പ്രാർഥിക്കാൻ മറിയം നമ്മെ പഠിപ്പിക്കുന്നു: “കർത്താവേ, നീ ആഗ്രഹിക്കുന്നത് നീ ആഗ്രഹിക്കുമ്പോൾ ഞാനും ആഗ്രഹിക്കട്ടെ.” പ്രാർഥനയിൽ, ഭയത്തെയും പരീക്ഷണങ്ങളെയും മറികടക്കാൻ മറിയം ശക്തി കണ്ടെത്തി, ദൈവത്തിന്റെ പദ്ധതി സ്നേഹത്തോടും എളിമയോടും കൂടി അവൾ സ്വീകരിച്ചു.
2. ഈശോയുടെ ജീവിതത്തിലും ആദിമസഭയിലും മറിയത്തിന്റെ പങ്ക്
ഈശോയുടെ ജനനം മുതൽ മരണ, പുനരുത്ഥാനം വരെയുള്ള മുഴുവൻ ഭൗമിക യാത്രയിൽ എപ്പോഴും പ്രാർഥനാപൂർവ്വം അനുഗമിച്ചവളാണ് മറിയം. ഈശോയുടെ സ്വർഗ്ഗാരോഹണത്തിനുശേഷം ശിഷ്യന്മാരോടൊപ്പം അവൾ പരിശുദ്ധാത്മാവിനെ കാത്തിരുന്നപ്പോൾ അവർക്കൊപ്പം അവൾ നിശബ്ദമായി പ്രാർഥിച്ചു.
കാനായിലെ വിവാഹത്തിൽ, അവൾ പ്രാർഥനയിലൂടെ ഇടപെട്ടു, കരുതലും മാതൃമദ്ധ്യസ്ഥതയും അവൾ കാണിച്ചു. അവളുടെ പ്രാർഥനാപൂർവ്വമായ സാന്നിധ്യം ആദ്യകാല സഭയ്ക്കു ഉത്തേജനം നൽകി. പരിശുദ്ധാത്മാവിന്റെ മണവാട്ടിയും വാസസ്ഥലവുമായ മറിയം തന്റെ പുത്രന്റെ മൗതീകശരീരമായ തിരുസഭയുടെ അമ്മയാണ്.
3. നിശബ്ദതയും ധ്യാനാതാത്മകതയും പ്രതിഫലിപ്പിക്കുന്ന ഹൃദയം
മറിയം, എല്ലാം തന്റെ ഹൃദയത്തിൽ സൂക്ഷിച്ച് ധ്യാനിച്ചിരുന്നവളായിരുന്നു. സന്തോഷമോ ദുഃഖകരമോ ആയ എല്ലാ സംഭവങ്ങളും അവൾ സ്വീകരിച്ചു പ്രാർഥനയിൽ അതിനെ രൂപാന്തരപ്പെടുത്തി. അവളുടെ ഹൃദയം ദൈവിക രഹസ്യങ്ങൾ ധ്യാനിക്കുകയും അംഗീകരിക്കുകയും ജീവിക്കുകയും ചെയ്യുന്ന ഒരു സ്ഥലമായി മാറി. മറിയത്തെപ്പോലെ, ദൈവവചനം സ്വീകരിക്കുകയും സഭയുടെ നന്മയ്ക്കായി അതിനെ പരിപോഷിപ്പിക്കുകയും ചെയ്യുന്ന ഒരു നിശബ്ദവും അനുസരണയുള്ളതും ധ്യാനാത്മകവുമായ ഒരു ഹൃദയം വികസിപ്പിക്കാൻ നാമും വിളിക്കപ്പെട്ടിരിക്കുന്നു. അവളുടെ പ്രാർഥനാപൂർവ്വമായ ജീവിതം നമ്മെ നിശബ്ദ സാന്നിധ്യത്തിന്റെയും ദൈവത്തിന്റെ പദ്ധതിയിലുള്ള പൂർണ്ണ വിശ്വാസത്തിന്റെയും ശക്തി പഠിപ്പിക്കുന്നു.
നിശബ്ദസമർപ്പണത്തിന്റെയും പരിഭവമില്ലാത്ത സഹനത്തിന്റെയും നടുവിൽ മറിയം മൗനവും മനനവുമായി ഈ ലോകത്തിൽ ജീവിച്ചു.
ഫാ. ജയ്സൺ കുന്നേൽ MCBS
