രാഷ്ട്രീയത്തിന്റെ പേരിലുള്ള അക്രമങ്ങളും കൊലപാതകങ്ങളും അവസാനിപ്പിക്കണമെന്ന് കെസിബിസി പ്രസിഡന്റ് കർദ്ദിനാൾ മാർ ജോർജ് ആലഞ്ചേരി. കൊലപാതക രാഷ്ട്രീയത്തിനെതിരെ പൊതുമനഃസാക്ഷി ഉണരണം. അത് വ്യക്തികളെയും രാഷ്ട്രീയ പാർട്ടികളെയും സ്വാധീനിക്കണമെന്നും അദ്ദേഹം പറഞ്ഞു.
കെസിബിസി ആസ്ഥാനമായ പാലാരിവട്ടം പിഒസി -യിൽ നടന്ന ക്രിസ്തുമസ് ആഘോഷത്തിൽ സന്ദേശം നൽകുകയായിരുന്നു അദ്ദേഹം. രാഷ്ട്രീയവിഷയങ്ങളുടെ പേരിലുള്ള പ്രശ്നങ്ങൾ മതസംഘർഷമായി വ്യാഖ്യാനിച്ചു വളർത്തരുത്. രാഷ്ട്രീയത്തിൽ വർഗ്ഗീയത കടന്നുവരുന്ന പ്രവണത ഭാരതത്തിലുണ്ട്. ജനാധിപത്യത്തിന്റെ സംശുദ്ധി വളർത്താനുള്ള പ്രവർത്തനങ്ങളാണ് വേണ്ടത്.
