നിത്യമാം പ്രകാശമേ നയിക്കുകെന്നെ നീ
ചുറ്റിലും ഇരുൾ പരന്നിടുന്ന വേളയിൽ
അന്ധകാരപൂർണ്ണമായ രാത്രിയാണുപോൽ
എൻഗൃഹത്തിൽ നിന്നുമേറെ ദൂരെയാണു ഞാൻ…
അനേകം സദസ്സുകളെ പ്രാർത്ഥനാമയമാക്കിയ ഗാനം. ഇന്ന് ലോകത്തില്‍ കൊറോണ ഇരുൾപരത്തുമ്പോൾ ഈ ഗാനം ഒരു പ്രാർത്ഥനയാക്കി മാറ്റുകയാണ് എറണാകുളം – അങ്കമാലി രൂപതയിലെ ഒരു കൂട്ടം വൈദികർ. പില്‍ഗ്രിംസ് കമ്മ്യൂണിക്കേഷന്‍സിന്റെ ബാനറില്‍ ചെയ്തിരിക്കുന്ന ഗാനമാണിത്. വീട്ടിൽ നിന്നും സ്വന്തബന്ധങ്ങളുടെ ഇടയിൽ നിന്നുമെല്ലാമാകന്ന് ദൈവജനത്തിനായി പ്രാർത്ഥിച്ചുകൊണ്ട് പലയിടങ്ങളിലായി ഒറ്റയ്ക്കായിരിക്കുന്ന ഈ വൈദികർ, തങ്ങളുടെ ഹൃദയത്തിന്റെ ഉള്ളിൽ നിന്നും സംഗീതമയമാക്കി, പ്രാർത്ഥനയാക്കി മാറ്റിയ ഈ മെഴുതിരി പാട്ടിന്റെ വിശേഷങ്ങളുമായി ലൈഫ് ഡേയ്ക്ക് ഒപ്പം ചേരുകയാണ് പില്‍ഗ്രിംസ് കമ്മ്യൂണിക്കേഷന്‍സിന്റെ ഡയറക്ടര്‍ ഫാ. ജേക്കബ് കോറോത്ത്.
കൊറോണ പടർന്നുപിടിച്ചതോടെ മിക്ക രാജ്യങ്ങളും ലോക്ക് ഡൌൺ പ്രഖ്യാപിച്ചു. എല്ലാവരും വീടിനുള്ളിലേയ്ക്ക് ഒതുങ്ങി. അച്ചന്മാരുടെയും അവസ്ഥ മറ്റൊന്നായിരുന്നില്ല. ഈ അവസരത്തിലാണ് എറണാകുളം – അങ്കമാലി രൂപതയിലെ അച്ചന്മാരുടെ ബാൻഡായ ’12 ബാൻഡ്’ ഒരു പാട്ടു ചെയ്താലോ എന്ന ആശയം മുന്നോട്ടുവയ്ക്കുന്നത്. 12 ബാൻഡ് അംഗങ്ങൾ എല്ലാവരും തന്നെ പലയിടങ്ങളിലാണ്! ഇടയ്ക്കിടെ കൂടുമ്പോൾ പാട്ടുകൾ ചെയ്യാറുണ്ടെങ്കിലും ഇപ്പോൾ, ഈ കൊറോണ കാലത്ത് ഒരുമിച്ചുകൂടുക എന്നത് അസാധ്യം. ഈ അവസരത്തിൽ ഒരു പാട്ടിന്റെ സാധ്യതകളെക്കുറിച്ച് വാട്സാപ്പിൽ അവര്‍ ചർച്ചകൾ നടത്തി. ഒരു പാട്ടെടുത്ത് എല്ലാവരെയും കൊണ്ട് പാടിച്ചശേഷം അതിൽ വർക്ക് ചെയ്യാം എന്നായി തീരുമാനം. ഒരു പാട്ട് ചെയ്യണം. ആ പാട്ട് ഒരു പ്രാർത്ഥനയാവണം! ഇതായിരുന്നു എല്ലാവരുടെയും അഭിപ്രായം.
ഈ സമയത്തു തന്നെയാണ് പ്രധാനമന്ത്രി ആരോഗ്യപ്രവർത്തകരെ അനുസ്മരിച്ചുകൊണ്ട് തിരി കത്തിക്കണം എന്നു പറഞ്ഞതും. അങ്ങനെയാണ് ആ പ്രാർത്ഥനാഗാനം മെഴുകുതിരിപ്പാട്ടായി മാറിയത്. അതിനു പറ്റിയ ഒരു പാട്ടിനായി ധാരാളം പാട്ടുകൾ നിർദ്ദേശിച്ചു. അതിൽ നിന്നാണ് ‘നിത്യമാം പ്രകാശമേ…’ എന്ന പ്രാർത്ഥന തിരഞ്ഞെടുത്തത്. ഈ സാഹചര്യത്തിന് ഏറ്റവും അനിവാര്യമായതും അർത്ഥവത്തായതെന്നും തോന്നിയതിനാലാണ് ആ പാട്ട് തിരഞ്ഞെടുത്തത് എന്ന് ജേക്കബ് അച്ചൻ വെളിപ്പെടുത്തി.
ആദ്യം ഒരു ചെറിയ മ്യൂസിക്ക് ചെയ്ത് അച്ചന്മാർക്ക് അയച്ചുകൊടുത്തു. ജെയിൻസ് തൊട്ടിയിലച്ചൻ അതിന്റെ ദൃശ്യങ്ങൾ കോർഡിനേറ്റ് ചെയ്തു. ആ ഫ്രെയ്മിൽ ലോകത്തിന്റെ പല ഭാഗങ്ങളിലിരുന്ന് അച്ചന്മാർ പ്രാർത്ഥനാപൂർവ്വം തിരി തെളിച്ചുകൊണ്ട് നിത്യമാം പ്രകാശമേ… എന്ന പാട്ടു പാടി അതിന്റെ ദൃശ്യങ്ങൾ അയച്ചുകൊടുത്തു. എറണാകുളം – അങ്കമാലി അതിരൂപതയിലെ പാട്ടുപാടുന്ന ഒട്ടുമിക്ക അച്ചന്മാരും ഈ പാട്ടു പാടി വീഡിയോ അയച്ചുതന്നു. വിയന്നയിലുള്ള ഫാ. ജാക്സൺ ആ വീഡിയോ പ്രോസസ് ചെയ്തു. ജേക്കബ് അച്ചൻ കലൂരിലിരുന്ന് ആ ദൃശ്യങ്ങൾ എഡിറ്റ് ചെയ്തു.
അമേരിക്കയിൽ നിന്നും യുകെ-യിൽ നിന്നും ഇറ്റലിയിൽ നിന്നുമൊക്കെ അച്ചന്മാർ ഈ പ്രാർത്ഥനാഗാനത്തിന്റെ ഭാഗമായി. പല ഇടവകകളിൽ നിന്നും പ്രീസ്റ്റ് ഹോമിൽ നിന്ന് ശങ്കൂരിക്കല്‍ അച്ചനും ഒക്കെ പാട്ടു പാടി അയച്ചു. ഒരു ഗാനം ചെയ്യാം എന്നുപറഞ്ഞപ്പോൾ അച്ചന്മാരുടെ ഭാഗത്തുനിന്നും ശക്തമായ പിന്തുണയാണ് ഉണ്ടായത്. ഇനി അച്ചന്മാർ മാത്രമല്ല, ഈ പ്രാർത്ഥനാഗാനത്തിന്റെ ഭാഗമായി മാറിയത്. എറണാകുളം – അങ്കമാലി രൂപതാധ്യക്ഷൻ മാർ കരിയിൽ പിതാവിന്റെ പാട്ടോടു കൂടിയാണ് ഇത് അവസാനിക്കുന്നത് എന്ന സവിശേഷതയുമുണ്ട്. കരിയിൽ പിതാവിനോട് ഈ കാര്യം പറഞ്ഞപ്പോൾ അദ്ദേഹവും രണ്ടുവരി പാടാമെന്നു സമ്മതിക്കുകയായിരുന്നു. പിതാവിന്റെ പാട്ട്, അത് കേൾവിക്കാരിൽ പ്രത്യേക ഒരുഅനുഭൂതി, പ്രതീക്ഷയുടെ ഒരു പൊൻകിരണം തെളിയിക്കുകയാണ്. വല്ലാത്ത ഒരു ഫീല്‍ ആണ് പിതാവ് പാടുമ്പോള്‍!
നാലു ദിവസം കൊണ്ട് തയ്യാറാക്കിയ ഈ വീഡിയോയില്‍ അതിന്റേതായ ചെറിയ പ്രശ്നങ്ങളുണ്ടെന്ന് ജേക്കബച്ചന്‍ സൂചിപ്പിച്ചു. എന്നിരുന്നാലും ലോകത്തിനു പ്രത്യാശ പകർന്ന ഒരു പാട്ട് തയ്യാറാക്കുവാൻ തങ്ങളെ ഒരു ഉപകരണമാക്കിയ ദൈവത്തിനു നന്ദി പറയുകയാണ് ഈ വൈദികർ.
പല പ്രായത്തിലുള്ള വൈദികർ, പല രാജ്യത്തായിരിക്കുന്നവർ കൊറോണ ഭീതി പടർത്തിയപ്പോൾ ദൈവജനത്തിനായി ബലിപീഠത്തിനു മുന്നിൽ ഏകനായി മുട്ടുകുത്തിയവർ. ഇവരുടെ ഉള്ളിൽ നിന്നുള്ള പ്രാർത്ഥന ആയതുകൊണ്ടാവാം ഒരുപക്ഷേ, ഇതുവരെ കേൾക്കാത്തൊരു മനോഹാരിത ഈ ഗാനത്തിനുള്ളത്. നമുക്കും കണ്ണുകളടയ്ക്കാം. ഈ ഗാനത്തിനായി കാതോർക്കാം. ഹൃദയം തുറന്ന് ദൈവത്തോട് പ്രാർത്ഥിക്കാം. ദൈവമേ ചുറ്റും ഇരുളാണ്… നീ നയിക്കണേ…
മരിയ ജോസ്
