നോര്ത്ത് കരോലിനയിലെ ദേവാലയത്തിന്റെ മുമ്പില് പ്രതിഷ്ഠിച്ചിരുന്ന വികൃതമാക്കപ്പെട്ട തിരുസ്വരൂപം ആശീര്വദിച്ച് വീണ്ടും പുനഃസ്ഥാപിച്ചു. ദശാബ്ദങ്ങളായി ഇവിടെ വണങ്ങിയിരുന്ന ഈശോയുടെ തിരുഹൃദയത്തിന്റെ രൂപമാണ് അജ്ഞാതര് ചുവന്ന പെയിന്റ് ഒഴിച്ച് വികൃതമാക്കിയിരുന്നത്.
വിശുദ്ധ കുര്ബാനയ്ക്കായി എത്തിയപ്പോഴാണ് വിശ്വാസികള് സങ്കടകരമായ ഈ കാഴ്ച കണ്ടതെന്ന് ഫാ. റോഗര് ആര്സ്പാര്ഗര് പറഞ്ഞു. ഞായറാഴ്ചയാണ് തിരുസ്വരൂപം വികൃതമാക്കപ്പെട്ട നിലയില് കണ്ടെത്തിയത്. അന്നേ ദിവസം ഉച്ചയായപ്പോഴേയ്ക്കും രൂപം കഴുകി പുനഃസ്ഥാപിക്കുകയായിരുന്നു. പോലീസ് കേസെടുത്ത് അന്വേഷണം ആരംഭിച്ചുവെങ്കിലും സംശയാസ്പദമായി യാതൊന്നും കണ്ടെത്തിയിട്ടില്ല. ഈ അക്രമം പ്രവര്ത്തിച്ച വ്യക്തികള്ക്കുവേണ്ടി തങ്ങള് പ്രാര്ത്ഥിക്കുന്നുവെന്നും ഫാ. ആര്സ്പാര്ഗര് പറഞ്ഞു.