ഒൻപതു വയസ്സുകാരിക്ക് മദർ തെരേസാ എഴുതിയ കത്ത്

അഗതികളുടെ അമ്മ മദർ തെരേസാ തെരുവിൻ്റെ മക്കളുടെ അമ്മ മാത്രമായിരുന്നില്ല; കുട്ടികളുടെ പ്രിയപ്പെട്ട വിശുദ്ധ കൂടിയായിരുന്നു. മദറിന് കുട്ടികളോടുള്ള സ്നേഹത്തിന്റെ പ്രതിഫലനമായി എഴുതിയ ഒരു കത്തിനെക്കുറിച്ചാണ് ഇവിടെ പ്രദിപാതിക്കുന്നത്.

സംഭവം നടക്കുന്നത് 1987-ൽ. ഒൻപതു വയസ്സുകാരി ലിസ് മുളളർ മദർ തെരേസായ്ക്ക് ഒരു കത്തെഴുതി. ഉപവിയുടെ സഹോദരി എന്ന നിലയിലുള്ള മദർ തെരേസയുടെ ജീവിതത്തെപ്പറ്റി ചോദിച്ചുകൊണ്ടുള്ള ഒരു ചെറിയ കത്ത്. കൂടെ ലിസ്, മദറിനുവേണ്ടി വരച്ച ചില ചിത്രങ്ങളും ആ കവറിൽ ഉണ്ടായിരുന്നു. വർഷങ്ങൾക്കുശേഷം ലിസ് മുള്ളർ ആ കത്തിനെക്കുറിച്ച് പറയുന്നു:

ആ കത്തിൽ ഞാൻ മദറിനോട്, ഒരു സിസ്റ്റർ എന്ന നിലയിൽ മദറിന്റെ ജീവിതം എങ്ങനെയുണ്ട്? ഉപവിയുടെ സഹോദരിമാർ അവരുടെ മുടി മുറിക്കാറുണ്ടോ? തുടങ്ങി ഒരു കൊച്ചുകുട്ടിയുടെ കൗതുകത്തോടെ കുറേ ചോദ്യങ്ങൾ ചോദിച്ചു. ചെറിയ കാര്യങ്ങൾ വലിയ സ്നേഹത്തോടെ ചെയ്യാറുള്ള കാരുണ്യത്തിന്റെ മാലാഖ ആ ചെറിയ കത്തിനും വലിയ വില തന്നു. ലിസിനും മദർ ഒരു കൊച്ചുമറുപടി അയച്ചു. ലിസ് അയച്ച കത്തിനും ചിത്രങ്ങൾക്കും നന്ദി പറഞ്ഞ് കുഞ്ഞുങ്ങൾക്കു ചേർന്ന ചെറുതും മനോഹരവുമായ ഒരു ആത്മീയ ഉപദേശം നൽകി. മദറിന്റെ ആ കത്ത് ഇപ്രകാരമാണ്…

പ്രിയ ലിസ്,

സന്തോഷപൂർവ്വമായ പ്രാർത്ഥനകൾക്കും നല്ല ആശംസകൾക്കും അയച്ച ചിത്രങ്ങൾക്കും നന്ദി. ഈശോ നിന്നെ വളരെ പ്രത്യേകാമാവിധം സ്നേഹിക്കുകയും എല്ലാവരോടും പ്രത്യേകിച്ച്, പാവപ്പെട്ടവരോട് പങ്കുവയ്ക്കാനായി വളരെ സന്തേഷവും ആനന്ദവും നൽകുകയും ചെയ്തിരിക്കുന്നു. നമ്മിലൂടെ, നിന്നിലൂടെ, എന്നിലൂടെ ലോകത്തെ സ്നേഹിക്കുന്ന ദൈവത്തിനു നമുക്ക് നന്ദി പറയാം.

ഈശോയുടെ കൊച്ചു സ്നേഹപ്രവർത്തികൾ നിനക്കും ചെയ്യാൻ കഴിയും. ഒരു പുഞ്ചിരിയിലൂടെ, ഒരു നല്ല വാക്കിലൂടെ, നിന്റെ സിറ്റിയിലുള്ള പാവപ്പെട്ടവരും എകാന്തരും അവഗണിക്കപ്പെട്ടവരും അനാഥരുമായ മനഷ്യരെ സഹായിക്കുന്നതിലൂടെ ഈശോയുടെ സ്നേഹത്തിന്റെ പ്രഭ നിന്നിലൂടെ മാതാപിതാക്കൾക്കും കൂട്ടുകാർക്കും അയൽക്കാർക്കും ലഭിക്കട്ടെ.

മനോഹരമായി പ്രാർത്ഥിക്കാൻ പഠിക്കുക. ഈശോയെ ഓരോ ദിവസവും കൂടുതൽ സ്നേഹിക്കാൻ മോളുടെ കൊച്ചുഹൃദയത്തെ വിശുദ്ധീകരിക്കണമേ എന്ന് നമ്മുടെ അമ്മയായ പരിശുദ്ധ മറിയത്തോട് പ്രാർത്ഥിക്കുക. ദൈവം നിന്നെ അനുഗ്രഹിക്കട്ടെ.

സി. തെരേസാ MC

മദറിന്റെ ഈ ചെറിയ ഉപദേശം, വളർന്നപ്പോഴും ലിസയുടെ ജീവിതം മനോഹരമാക്കുന്നു.

ഫാ. ജയ്സൺ കുന്നേൽ MCBS

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.