കൊച്ചി: കഴിഞ്ഞവർഷം ഗാന്ധി ജയന്തി ദിനത്തിൽ തുടങ്ങിയ ‘ക്ലീൻ ഹോം ക്ലീൻ സിറ്റി’ പദ്ധതിയുടെ രണ്ടാം ഘട്ടത്തിനൊരുങ്ങിയിരിക്കുകയാണ് കത്തോലിക്കാ കോണ്ഗ്രസ്. ഈ വർഷം ഗാന്ധി ജയന്തി ദിനത്തോടനുബദ്ധിച്ച് രണ്ടാം ഘട്ട പ്രവർത്തനങ്ങൾ ആരംഭിക്കും.
പ്രവർത്തകരുടെ ഭവനങ്ങളും പൊതുസ്ഥലങ്ങളും ഒക്ടോബർ രണ്ടിനു ശുചിയാക്കാനാണ് കത്തോലിക്കാ കോണ്ഗ്രസ് പദ്ധതി ഇടുന്നത്. രൂപത, ഫൊറോന, ശാഖാ തലങ്ങളിൽ മാലിന്യനിർമ്മാർജ്ജ്ന പ്രവർത്തനങ്ങളും നടപ്പിലാക്കും. മാലിന്യങ്ങളും പകർച്ച രോഗങ്ങളും അതിജീവിക്കാൻ ബോധവത്കരണ പ്രവർത്തനങ്ങൾ നടത്താൻ കത്തോലിക്ക കോണ്ഗ്രസ് കേന്ദ്രസമിതി തീരുമാനിച്ചിട്ടുണ്ട്.
പ്രസിഡന്റ് വി.വി അഗസ്റ്റിൻ യോഗത്തില് അധ്യക്ഷത വഹിച്ചു. യോഗത്തിൽ ജനറൽ സെക്രട്ടറി ബിജു പറയന്നിലം വിഷയാവതരണം നടത്തി. ഡയറക്ടർ ഫാ. ജിയോ കടവി, ഭാരവാഹികളായ ജോസുകുട്ടി മാടപ്പിള്ളി, സാജു അലക്സ്, ടോണി പുഞ്ചക്കുന്നേൽ, സ്റ്റീഫൻ ജോർജ്, ഡേവീസ് പുത്തൂർ, ബേബി പെരുമാലി, സൈബി അക്കര, ഡേവിസ് തുളുവത്ത് എന്നിവർ സംസാരിച്ചു.